ANG katawhan, sa ilang pagpili og mga bag-ong lider, nangindahay nga adunay mga kausaban alang sa kaayohan ug mas paspas nga serbisyo. Unsa man kaha ang mapaabot sa katawhan sa syudad sa Sugbo niining pagkapili ni Mayor-elect Edgardo Labella?
Si Labella, sa taho ning maong pamantalaan, namahayag nga himuon niyang 24 oras ang serbisyo nga gitanyag sa City Hospitalization and Medicine Program (Champ) sa dakbayan sa Sugbo sa higayon nga makalingkod na siya sugod sa Hulyo 1.
“Because of the situation wherein there are emergency that needs immediate assistance from the City. I will make the availability of the Champ services 24 hours a day,” matod pa ni Labella nga mao karon ang bise mayor sa syudad.
***
Ang serbisyo sa Champ ngadto sa usa ka pasyente naglakip sa P25,000 nga hospitalization benefit, P5,000 para sa tambal ug laing P5,000 nga balor sa laboratory procedures nga mapahimuslan matag tuig gikan sa gobyerno sa syudad sa Sugbo.
Si Labella niingon nga nahunahunaan niyang ang paghimo sa maong serbisyo nga 24 oras tungod kay gusto niya nga way putol ang paghatag og serbisyo ngadto sa mga Sugbuanon labi na sa panahon sa emerhensiya.
Subay niini, butangan niya og Champ personnel 24 oras ang mga accredited nga mga hospitals sa syudad nga maoy moatiman niadtong nanginahanglan sa serbisyo sa champ labi na sa panahon sa kagabhion.
***
Giawhag usab ni Labella sa mga tag-iya ug tagdumala sa mga tambalanan nga accredited sa Champ nga di balibaran ang mga pasyente gikan sa dakbayan nga walay P10,000 nga ika-deposito sa ilang pagpatambal sanglit naa ang Cebu City Government.
“I urged the private hospitals which are accredited with our Champ that they should not refuse the admission of (Cebu City) residents,” matod pa ni Labella. Kiini maoy mahinungdanon kay mag-unsa man ang Champ kon naimpas na ang pasyente.
Ang mga hospital nga akreditado sa Champ naglakip sa Chong Hua Hospital, Cebu Doctor’s University Hospital, Saint Vincent Hospital, Velez Hospital, Cebu City Medical Center ug Vicente Sotto Memorial Medical Center.