DILI i-renew sa Land Transportation Franchising and Regulatory Board sa Central Visayas ang prangkisa sa mga operator og public utility jeepneys nga wala mokuha sa ilang fuel subsidy cards nga gihatag sa gobiyerno.
Si LTFRB 7 Director Eduardo Montealto Jr. nibutyag nga gawas sa renewal ug paghatag og certification sa prangkisa, di usab tugotan ang mga operator nga makalukat og taripa labi na karon nga gipatuman na ang umento sa minimum nga pletihan nga P8.
Sumala niini dili nila tugotan ang mga operator nga makahimo og transaksyon sa ilang buhatan kon di kini mokuha sa ilang Pantawid Pasada Program (PPP) cards.
Matod ni Montealto, gibuhat nila kini aron ang mga drayber magpakabana sa pagkuha sa ilang cards sa Land Bank of the Philippines sa Osmeña Boulevard corner P. del Rosario St., siyudad sa Sugbo.
“Effective ni siya kay mapugos naman sila moadto sa Land Bank aron mokuha sa ilang cards,” pahayag ni Montealto dihang nahinabi sa Superbalita Cebu.
Ang LBP ang gi-tap sa Department of Transportation sa pag-apud-apod sa PPP cards.
Sigon sa director sa 10,600 ka cards nga nadawat na sa Central Visayas, 35 porsyento pa lang niini ang nakuha sa mga operator.
Matag card, dunay sud nga P5,000 nga subsidy sa gobiyerno alang sa mga operator aron mapagaan ang epekto sa Tax Reform Acceleration and Inclusion (Train) Law gumikan sa excise tax sa mga produkto sa petrulyo.
Si Montealto namahayag makatabang ang cards sa mga operator labi na nagsaka ang presyo sa mga produkto sa petrulyo.
Karong 2019, P20,000 ang subsidy nga ihatag sa gobiyerno sa mga operator og PUJ nga bahinon sa tag P5,000 sa matag quarter.
Apan sumala ni Montealto nga di makuha ang ikaduhang hugna sa subsidy kon di mominos ang cards nga nahabilin nga wa pa makuha.
Niadtong Agusto 2018, naabot ang 5,354 ka unang batch sa PPP cards ug kapin pa sa 1,000 ang wala pa makuha. Pagka Marso 28, 2019, naabot ang dugang kapin sa 5,000 ka cards nga maoy second batch.
Adunay dul-an 12,000 ka PUJ units sa Central Visayas base sa rehistro sa mga prangkisa o certificates of public convenience sa LTFRB 7.
Nakita sa director nga nagduhaduha og kuha og PPP cards ang mga operator kay maglikay nga maglalis tali sa drayber nga gusto usab makapahimus sa tabang pinansiyal sa kagamhanan.
“Ang ubang drayber masuko nganong ang mga operator ang gihatagan nga sila man ang nag-drive, nangabang,” dason ni Montealto.
Laing rason nga iyang nakita nga ang ubang mga prangkisa kay gibaligya ngadto sa laing tawo o operator apan nagpabilin gihapon ang pangan sa orihinal nga operator.
Sugod sa Agusto 13, 2016, wala na gitugot sa LTFRB 7 ang pagbaligya ug pagbalhin sa prangkisa sa laing tawo.
Matag card, ang pangan sa orihinal nga operator ang nakabutang busa dili kini mahimo magamit sa laing tawo.
Si Montealto niangkon nga maglisod na usab sila pagpangita sa address sa ubang operators nga naa na sa laing mga nasod o sa mga probinsya sa Bohol, Negros Oriental ug Siquijor kon di kini ang mangunay sa pagkuha sa cards. (B)