GIAWHAG sa pangulo Department of Education (DepEd) Cebu City ang mga tinun-an sa kindergarten, elementary ug high school nga importante nga mosulod na sa ilang klase sugod sa unang karong adlawa.
Si Division Supt. Bianito Dagatan niingon nga angay wagtangon sa hunahuna sa ginikanan ug mga tinun-an ang ilang naandan nga mopalta sa unang mga adlaw sa pagbukas sa klase sanglit sa bag-ong panahon andam na ang mga tunghaan.
“Sugod na gyud tag klase ugma. Hopefully atong gipaabot nga tanan natong mga bata motunga na ug dili magpaabot pa og laing adlaw.” Awhag ni Dagatan atol sa interbyu sa Superbalita Cebu.
Gipasabot niya nga sayop ang hunahuna sa ubang ginikanan sanglit ang DepEd matag tuig nilusadog Brigada Eskwela aron sa opening sa klase andam na ang tanan.
Si Dagatan niingon nga base sa ilang gitawag og automatic enrolment, adunay 178,000 ka mga bata sa public school ang modagsa karong adlawa sa 80 ka barangay sa dakbayan sa Sugbo.
Gipanglantawan nga mosaka ang enrolment ngadtuon sa 182,000 gumikan sa increase sa populasyon.
Lain pa ang libuan ka mga tinun-an gikan sa private school apan ang ilang management gihatagan og hangtod Agusto 31 sa paghukom sa ilang pagbukas sa klase.
NO COLLECTION
Gipahimangnuan sa labaw sa DepEd Cebu City ang 6,000 ka mga magtutudlo nga dili mangolekta sa unang buwan sa pagtungha.
Si Dagatan niingon nga mahimong makakolekta ang mga titser apan adto na sa buwan sa Hulyo.
“Naa tay gitawag og authorize pero naa gyud na siyay apelyido nga voluntary so by July they can collect but voluntary ug dili siya pwede himuon nga rason pananglit sa niaging tuig naay wa mabayri ang estudyante dili na siya pwede himuong rason nga dili mahatag ang credentials kay wa pa kabayad kay ang konsepto voluntary man,” dugang ni Dagatan.
Kon adunay maestra nga mamugos sa mga bata aron lang makaamot, mahimo kining mag-atubang og kaso.
“Pahibawo lang sa division ug naay formal nga report kay ato dayong ipa-imbestigar sa atong legal office ug mag-atubang og administrative case in violation sa office rule nga gi-implement sa Office of the Secretary sa DepEd,” awhag ni Dagatan.
Ang eskwelahan adunay gitawag nga voluntary contribution sama pananglit sa Anti TB, Boys ug Girls Scout, Red Cross, School Publication ug PTA sa matag ginikanan kansang kantidad moabot og P200 matag tuig.
Ang mga eskwelahan adunay pundo nga madawat gikan sa DepEd nga ilang gitawag og Maintenance and Other Operating Expenses nga maoy gamiton para sa gastuan sa tunghaan matag tuig. /