TULO ka mga sakop sa usa ka pamilya ang nalubong-buhi dihang natabonan og yuta nga limestone sa abandonadong quarry site sa Barangay Paz, Poro, Cebu, alas 7:40 sa buntag kagahapon, Dominggo, Hunyo 2.
Hinuon, ang magtiayong Francisco, 41, ug Gemmalyn Monte, 33, uban sa ilang 8-anyos nga anak nga si Wilbert naluwas human sa dul-an sa tulo ka oras nga rescue operation.
Sumala sa imbestigador nga si Police Master Sargent Adren Elcoh Carba sa Poro Police Station, ang pamilya nanguha og limestone sa dapit apan dunay usa ka bahin sa quarry nalusno hinungdan nga nalubong ang tulo.
“Nakadawat mi og report mga alas 9:45 pm. Gi-rescue sila sa Poro Rescue team. Last nakuha ang bata kay mano-mano ra ang pag-ugkat kay wala may equipment mapasulod,” matod ni Carba.
Ang mga biktima gidala sa Poro District Hospital sa San Francisco alang sa dinaliang pagtambal.
Kahinumdoman, dugang ni Carba, niadtong Oktubre 2018, duha ka mga residente ang namatay sa samang quarry site.
Matod ni Carba, daghag residente sa dapit ang mosulod sa abandonadong quarry sa pagkuha og limestone aron ilang ibaligya.
“Ang mga residente mao ra man pod ilay panginabuhian usahay. Nagmanomano nalang sila’g kubkob didto, ibaligya sinako,” dason ni Carba.
Dugang niya nga ang quarry giablihan isip materyal atol sa pagtrabaho sa usa ka dalan sa maong barangay pipila na ka tuig ang nakalabay. (B)