HUMAN sa disgrasya sa kadalanan sa Dakabayan sa Davao nga gikamatay sa duha ka mga babaye, subling gipakusgan sa lokal nga kagamhanan ang pagbutang og ngipon sa Republic Act No. 10586 kun “Anti-Drunk and Drugged Driving Act of 2013.”
Subling nagpahimangno si Davao City Mayor Sara Duterte-Carpio nga dili gayod mag-maneho og sakyanan kung naka-inom og alak.
“Naghuna-huna mi nga i-intensify ang campaign sa awareness sa mga tawo nga pag naka-inom, dili gyod mo-drive, kana lang ang gusto nato na mahitabo maka-remember sila nga when they are drunk, dili gyod mogunit or momaneho sa sakyanan,” sulti sa mayor nga nahinabi sa mga tigbalita.
Gawas niini, gipakusgan sab ang kampanya sa overspeeding nga gitimon sa City Transport and Traffic Management Office.
“Nag-discuss mi unsa pa pweding mabuhat sa City Government because dako kaayo ta’g push sa atoang kapulisan nga magdakop sa overspeeding, magdakop sa drunk driving and yet makakita gihapon ta og instances nga naay madisgrasya, mamatay tungod sa drunk driving,” segun sa mayor.
Abtik nga pakabana ni Mayor Sara, ug gani una niini ang mayor nagpahimangno gyud daan sa publiko pinaagi sa dagkong mga tarpaulin sa mga flyover sa siyudad nga di gayod motabang ang lokal nga kagamhanan sa mga nadisgrasya kung kini bunga sa ilang pagsupak sa mga balaud nga gipatuman.
Usa ka dakong leksyon ang nahitabo nga bangga sa Quimpo, Boulevard nga gikamatay sa duha ka babaye, leksyon sa tanang drayber ma-pribado man o publiko nga kinahanglan hunahunaon una sa makadaghan ang kamahinungdanon sa kinabuhi.
Ang kinabuhi, ka usa ra, busa atoa kining ampingan.