GIKAN sa 18,580 ka mga kremin niadtong 2017, nahimo na lamang kining 14,911 sa 2018, nagpasabot dunay pagkunhod og 3,699. Kini basi sa ulahing report sa kapolisan kabahin sa crime volume sa National Capitol Region.
Matod ni Major General Guillermo Eleazar, nikunhod og 57.69 porsento ang kremin sa Metro Manila sa unang 35 ka bulan sa pamunuon ni Presidenti Rodrigo Duterte.
Sagad sa mga kremin nga niminus mao kining murder, homicide, physical injuries, rape, robbery, theft ug carjacking.
Gitumbok ni Eleazar ang pagbalik sa kompeyansa ug pagsalig sa katawhan ngadto sa kapolisan nga maoy unang hinungdan sa pag-ubos sa kreminalidad.
Gawas pa, midugang si Eleazar nga sagad sa mga tawo nga mibuhat sa maong kremin mga adik ug daghan kanila ang nangapriso ug nangamatay na.
Makapaabot kaha kita nga mopadayon na gyud kining pag-ubos sa crime volume, dili lang sa Metro Manila, apan sa ubang bahin sa nasod?
Dunay mga pagtuon nga kining mga duguon ug bayolenting pelikula maoy usa sa naka-impluwensiya sa tawo paghimo og kremin.
Kumusta man ang atong Moview and Television Review and Classification Board, nagtamod ba kaha sila sa ilang katungdanan? Nganong daghan pa mang mga salida sa sinihan ug telebisyon nga makita nato nga wa gyud magdulot og maayong pagtulon-an?
Dili nato pasagdan kining mga higanting negosyanti sa media -- television, sinehan, radio ug pamantalaan, nga mopadayon sa ilang pagyagyag og mga eksena sa pelikula nga naghatag lamang og daotang impluwensiya sa katilingban.
Laing pagtuon nagbutyag nga kining simbahan, eskwelahan ug ang panimay dako og kaakohan paggiya sa tawo aron mahimong mabuot nga molupyo, dili badlongon sa katilingban.
Gihimo ba kaha sa atong mga pari, pastor, ministro, mga magtutudlo ug ginikanan ang ilang responsibilida?
Ang nakaparat sa atong sitwasiyon karon mao nga mismo ang mga ginikanan dili pud makahatag og insaktong giya sa ilang kabataan, labi na kadtong linghud pa gyud og panghunahuna. Tiaw mo, magdungan pa gani og tan-aw sa sinehan ug telebisyon.
Ang simbahan lugak sab ilang kampaniya batok sa sugal, inom ug uban pangbisyo, labi na kining pagtan-aw sa bayolenti nga mga pelikula.
Unya, kon mogara na gani ang kreminalidad sa atong palibot, basolon dayon ang gobiyerno? Kinsa man gyud ang angay basolon sa kreminalidad sa atong palibot?