HUMAN sa duha ka bulan nga paghatag og libreng pagpasusi sa mga sakyanan ilabi na sa nakalapas sa Clear Air Act o Republic Act 8749, pormal na nga gisugdan niadtong Lunes, Hunyo 3, ang pagpangdakop ang mga nakalapas niini.
Gibutyag ni Engr. Armen Cuenca, ulo sa City Local Environment and Natural Resources, nga gisugdan na pagpangdakop sa mga nakalapas sa balaod.
"Pagasungdan na karong adlawa matag adlaw Lunes paingon sa Biyernes alas 9 ngadto sa alas 4:00 ang pag-apprehend sa tanang sakyanan dinhi sa atong dakbayan nga mosulod o mogawas o moagi sa atong dakbayan," matud ni Cuenca.
Gidugang pa nga tumong niini mamahimong limpyo ang palibot ug preskong hangin ang malanghab sa katawhan.
"Aron nga ang atong kahanginan nga langhabon presko hinaot unta so sugod karon a tong i-implement ang anti-smoke belching ordinance," dugang niini.
Nasayran nga ang nakalapas niini sa unang higayon dunay P500 nga multa ug P1,000 sa ikaduhang kalapasan ug uban pa lakip na ang pagpailalom sa seminar kalabot na sa pollution control and management nga ipahigayon sa Land Transportation Office, samtang suspendihon ang Motor Vehicle Registration sulod sa unom ngadto sa usa ka tuig alang sa ikatulong kalapasan.