MOABOT ngadto sa pito ka mga wanted person ang mga nadakpan niaging semana sa nagpadayong operasyon sa kapolisan sa mga municipal police station sa Misamis Oriental Provincial Police Office (Moppo).
Sunod-sunod nga operasyon ang gihimo sa Balingasag Police Station nga miresulta sa pagkasikop sa tulo ka mga wanted person.
Unang nadakpan ang duha ka mga suspek nga giilang sila si Junrie Palamine, 26, taga Barangay Waterfall, susamang lungsod, ug Rovel Nala, 27, taga Barangay Agusan sa siyudad sa Cagayan de Oro, human adunay kasong homicide nga giatubang.
Nadakpan kini sa kapolisan didto sa Alae, Manolo Fortich, Bukidnon mga alas 5:30 sa kadlawon kauban ang kasundalohan.
Nasikop sab sa operatiba sa Balingasag Police Station mao si Herman Jambas, 36, ulitawo kinsa nag-atubang og kasong slight physical injuries.
Dakpan sab ang ika number 10 most wanted sa lungsod sa Opol nga mao si Gary Fernandez, 25, ulitawo, taga Malanang, susamang lungsod.
Gisilbi sa operatiba sa Opol Police Station ang warrant of arrest sa suspek human nag-atubang kini og kasong kasupakan sa Republic Act 7610, kon Special Protection of Children Against Abused, Exploitation and Discrimination Act.
Adunay girekomendar ang korte nga P80,000 nga piyansa alang sa temporaryong kagawasan niini.
Sikop sab sa Gingoog City Police Station ang usa ka Sopronio D. Aban, 36, minyo, taga Barangay 24-A, Gingoog City, ug nag-atubang og kasong frustrated murder. Ang korte mirekomendar niini og P120,000 nga piyansa.
Laing nadakpan nga mao si Rita Awayan, 47, taga Barangay 26, Gingoog City, ang nag-atubang og kasong grave threats ang gisilbihan og warrant of arrest.
Samtang dakpan usab sa Lagonglong Police Station si Marjun Galleto, 18, ulitawo, taga Barangay Kabulawan, lungsod sa Lagonglong, Misamis Oriental, human gihapon adunay kasong frustrated murder nga adunay girekomendar ang korte nga piyansa mobalor og P200,000.
Gidayeg ni Police Colonel Rolando Destura, ang provincial director sa Moppo, ang walay puas ug padayon nga pagpangdakop sa kapolisan hilabina niadtong mga suspetsado nga adunay mga warrant of arrest.
Padayon sab kining nga ipatuman ang anti criminality campaign dinhi sa lalawigan.