KAGAHAPONG adlawa, gibalik na sa nasod sa Hong Kong ang ilang mga basura nga nahidangat sa Mindanao International Container Terminal (MICT) sa lungsod sa Tagoloan, Misamis Oriental.
Una kining gikumpirmar sa MalacaƱang pinaagi ni Presidential Spokesman Salvador Panelo nga ang ilang basura nga gitawag niining "assorted electronic accessories" ang angayan lamang nga ibalik sa Chinese Administrative Region.
Gumikan sab niini, nanawagan kini sa buhatan sa Bureau of Customs (BOC) nga padayonon ang pagmaigmat aron mababagan kining mga ilegal nga pagsulod sa mga basura sa nasud.
"We call on concerned agencies of the government to continue exercising vigilance and hinder the entry of such shipments of garbage into our territorial jurisdiction at the first instance," matud ni Panelo.
Gikumpirmar ni John Simon, ang port collector sa MICT, nga niabot kining basura niadtong Pebrero 15, 2019 ug gidala pinaagi ni Hin Yuen Tech. Env. ug adunay consignee nga nga Crowd Win Industrial Limited nga nakabasi sa Pasay City.
Ang cargo adunay gibug-aton nga 25,610 ka kilo nga gilangkoban sa giguba guba ug gidugmok ngamga electronic devices sama sa cellphone, computer ug uban pa.
Ang shipment's broker giila nga si Yolanda Narandan diha sa Door 1, Nacalaban Building, Julio Pacana St., Barangay 23.
Dugang ni Simon nga nakadawat siya og impormasyon nga aduna pay 70 ka container van nga adunay sulod electronic waste maayo na lamang nga una kini nilang nasapon. Gikonsidera sab niining deadly kini nga mga basura.
Si Panelo miklaro nga ang nasod sa Pilipinas dili basurahan.
"The Palace reiterates the firm position of the Republic of the Philippines that it will not allow its territory to be treated as a dumping ground for trash by any foreign country or entity," ni Panelo.
Una na nga gipahibalo ang mga nangabot nga mga basura nga nahidangat dinhi sa nasod sama sa Canada, South Korea ug Australia.
Ang mga basura sa Canada gibalik na niaging semana samtang nagpabilin pa ang tone toneladang basura gikan sa South Korea ug Australia karon panahona.