KIDAPAWAN CITY -- Malampuson nga nigraduwar ang 50 ka mga priso sa North Cotabato District Jail (NCDJ) human gipailawom sa “skills training” sa Technical Education Skills Development Authority (Tesda)-Soccsksargen.
Ang 50 ka priso nahuman sa pagbansay sa appliance repair sulod mismo sa district jail sa Barangay Amas sa dakbayan.
Nasayran nga mga materyales nga ginamit sa pagbansay-bansay gihatag sab sa Tesda mismo.
Gawas sa appliance repair, estudyohan sab sa mga priso ang food processing ug carpentry.
Kahinumdoman nga sa unang gipasiugdahan nga skills training sa Tesda, 25 ka priso ang nahuman sa welding o SMAW NC-II samtang 30 sab sa meat processing ug 50 sa bread making.
Ang programa sa BJMP nga giabagan sa Tesda nagtumong nga tabangan ang mga priso aron nga sa ilang paggawas makapangita dayon sila og trabaho.
Nasayran nga gawas sa mga priso, mahimo sab nga bansayon sa Tesda ang mga rebel returnees, drug dependents, mga estudyante, out-of-school youth ug uban pa. (Edgar E. Fuerzas)