WAY nagtuo nga mamilyunaryo si Edok. Ah, bilyunaryo seguro, kay daghan na kaayo siyag negusyo. Mga bilding niya sa siyudad nanurok daw mga uhong. Si Edok kutob ra sa tersero anyo sa hayiskol; wa makalahos tungod sa kawad-on.
Suod mi kaayo si Edok nga karon Don Eduardo Sacol na. Kaniadto akoy tighatag niyag bawon, tunga sa ihatag nako sa akong amahan nga hepe sa kapulisan sa among lungsod. Tagaan ko pa gani siya sa daan na nakong mga biste. Nalipay si Edok sa akong kaluoy sa iyang pagkabutang.
Usa ka higayon nananghid siya nako nga moundang na kay manglalin sila sa Mindanao uban sa tibuok pamilya. “Mobawos ra unya ko nimo, Ernesto.”
Midagan ang katuigan. Nasiga ang akong mga mata sa iyang ka-espoting dihang siya miduaw nako. Nasayran ko nga malampuson siyang negusiyante sa Davao City ug naghunahuna siya nga magtukod og mga negusyo dinhi sa Sugbo. May gisugilon siya nako nganong siya nadato.
Naglain siyag puyo sa Mindanao sa usa ka bungtod nga tambok ang yuta. Iyang giuma. Maayong tubo ang iyang kamaisan sa banghilig sa bungtod nga mitadlas sa patag. Doble Cruz ang ngalan sa iyang gipuy-an nga dapit.
Usa ka adlaw nangabot sa ilang dapit ang usa ka treasure hunter kuyog og mga tawo. Diha sila manglungag sa bungtod nga iyang gitikad.
“Kon mapalgan namo ang gold bars suma ning among treasure locator bahinan ka namo,” matod sa ‘treasure hunter.’
Apan milabay na lang ang usa ka tuig way gold bars ang nakita ni Mr. Arong, ang treasure hunter. Ilang gibiyaan ang bungtod.
Sa iyang kahikurat may nakita siyang puthaw nga migimaw sa silong sa iyang payag. Iyang gisusi. Nahibaw-an niya nga mga gold bar kini nga abi niyag mga puthaw. Milagoy siya. Mibalhin siyag puyo sa Cagayan de Oro. Dinhi misugod ang iyang negusyo hangtod midaghan.
“Di akoa ning tanan, Ernesto, hinatag sa Diyos. May gitukod kong mga balay sa kaluoy, mga simbahan ug kapilya akong gitabangan.” Mitug-an siya nga sa mga dagkong eskuylahan sa Mindanao daghan siyag gipanghatag nga mga scholarship grant.
“Nakahuman ka na sa imong kurso ug maayo ka pang tawo, ikaw ang akong padad-on sa akong negusyo dinhi sa Sugbo,” matod ni Edok kanako.
Sa rooftop sa 45th floor sa Edok Real Estate Bldg. nalantaw ko ang daghang Edok Bldg nga ningkatap sa skyline sa Sugbo. Nagpanglingo ko kay wa ko magdahom nga ako maapil sa agos sa kadato ni Edok nga gikaluy-an sa Ginuo. Suwerte nga tawo! (KATAPUSAN)