PAREHONG hot topic karon sa social media ug bisan asang suoka ang nagpadayong NBA finals ug ang coronation night sa Bb. Pilipinas 2019 nga himuon na sa Dominggo, Hunyo 9.
Sa NBA, akong nakita sa bolang krystal (haha..) nga kon di kaabot og Game 7 ang Golden State Warriors gihapoy maghari. Pero kon moabot og Game 7 ang Toronto ang mokampiyon. Na, ingna kong bakakon.
Pero ang mga star players sa Warriors kay di susama og karisma nilang Michael Jordan, Kobe Bryant ug Lebron James.
Mao tingaling bisan underdog ang Toronto, maorag mas daghan pa ang ganahan nga silay modaug.
Pero nganong molaban man ta sa Toronto, Canada nga gihan-okan man ta nila sa ilang pila ka mga tenoladang basura nga nanimaho nang pan-os sa Subic?
Finally, gikuha na diay kuno niadto lang Biyernes. Ay salamat. Sige lang, basta kay Toronto gihapon ko. Haha...
Korona
Sa Bb. Pilipinas 2019 inilog ang uyab ni Jason Abalos nga si Vicki Rushton nga maoy modaug sa Bb. Pilipinas International.
Samtang sa titulo nga Bb. Pilipinas Universe giingong magkombati ang mga beterana sama nilang Samantha Bernardo, Emma Tiglao, Gazini Ganados ug Atty. Patricia Magtanong.
Sakto ang panahom sa mga beauty queen nga atong nahinabi nga doble kayod karon ang mga kandidata sa Bb. Pilipinas tungod sa kataas sa standard sa ilang gisundan nga si 2018 Miss Universe Catriona Gray.
Pero sama sa bola sa basketball, lingin sad ang korona. Lisud tag-anon kon kinsa gyud.
Sunshine Family
Showing na ugma ang pelikulang “Sunshine Family” nga gikan sa award-winning 1992 Japanese film, “Hit-and-Run Family.”
Usa ni ka comedy-drama nga gi-shoot sa Seoul ug Yangpyeong County nga gibituonan sa real-life Filipino couple Nonie ug Shamaine Buencamino.
Naa sad silang Sue Ramirez ug Max (Your Face Sounds Familiar fan-favorite Marco Masa) isip mga anak. Gibituonan sad ni sa KPop idol Shinwoo sa boyband Blanc 7 nga maoy leading man ni Ramirez.
Usa diay si Piolo Pascual sa mga producer ani? Mokita kaha ni? Mokita, di.. mokita, di... Haha...