MORAG ubay-ubay gyud ang nasungag sa kapildihan sa Toronto Raptors sa Game 2 kagahapon batok sa defending champion Golden State Warriors sa nagpadayon nga 2019 NBA Finals da.
Nigrabi man gud og kadaghan ang mga nipusta sa Raptors sa dihang maayo kaayo kining nakaduwa sa Game 1 diin ilang gipukan ang Warriors, 118-109, niadtong Huwebes diha sa ilang kaugalingong korte sa Scotiabank Arena.
Pero kagahapon, hinayhinay nang migimaw ang kahanas ug ka-esperiyensiya sa Golden State ug bisan pa man og gihamok sa mga injuries, nakahimo gihapon kini sa pagkontrolar sa duwa.
Sa ato nang gikaingon dinhi ning atong lindog, nga sa Game One atoa pabor sa Raptors ang momentum tungod kay bag-o ug hataas pa ang ilang moral gumikan sa wala damha nilang pagpalagpot sa no. 1 team nga mao ang Milwaukee Bucks sa Eastern Conference finals.
Unya ang Warriors taodtaod kaayong nakapahuway nga posibling nakaapekto sa ilang kalantip.
Kon wa makapakita og saktong kayod ang higanting si DeMarcus Cousins sa Game One nga maoy iyang unang duwa sa NBA Finals, kaghapon lahi ang dagan kay ang iyang presensiya sa ilawom nga bahin maoy nahimong dakong problema sa Raptors.
Gani double-double ang iyang performance kagahapon nga igo na kaayong naka komplementar sa opensa nila ni Stephen Curry, Klay Thompson ug Draymond Green.
Bisan gani si Andrew Bogut nga makaduwa sa Game One nagamit na usab og maayo.
Sa laktod nga pagkasulti, hinayhinay nang nakuha ni coach Steve Kerr ang orihinal nga timplada sa iyang team pinaagi sa paggamit sa iyang mga bigmen nga maoy iyang advantage batok sa Raptors. Sa ato pa makakombati sila bisan og wala pa si Kevin Durant.
Pero yuna ra. Dili na kaha gyud makaduwa og balik si Durant sa Warriors?
Posibli. Kini tungod kay nabaniog na kaayo nga ang Finals MVP sa miaging tuig gusto mosulod sa free agency ug mobiya sa Golden State.
Tungod niini, dunay mga pangagpas nga gipangandaman nang daan sa Warriors nga mawala nila si Durant hinungdan nga gibingat og maayo ang pagpaalim sa iyang injury.
Si coach Steve Kerr, kon pangutan-on sa mga media kon kanus-a makabalik og duwa si Durant di motug-an o mobana-bana og petsa.
Kini maoy gikahibulong sa kadaghanan kay sagad sa mga ma-injured mahibaw-an man gyud og pila ka adlaw ang kinahanglanon sa pagpaalim.
Gihulagway nga usa lang ka simple calf strain ang naangkon ni Durant ug niadto pang Mayo 8 atol sa Game 5 sa ilang pagpakigbatok sa Houston Rockets sa Western Conference semis.
Matod pa nga kining ingon aning angol modangat lang og duha ka semana nga maalim na pero modagan na ngadto sa upat ka semana ug hangtod karon wa pa gihapon siya paapila sa praktis. Kini maoy nakapalig-on sa pagduda nga di na nila paduwaon si Durant.
•••
Happy fiesta diay sa Barangay Pondol, lungsod sa Balamban. (jun.migallen22@gmail.com)