MITALI og 21 puntos si Jovan Repuela, midugang og 20 si Lyle Eredera ug otso puntos usab ang natampo ni Cedric Manayon sa dihang gitipi sa Barangay Cuanos ang Tulay 2, 87-74, sa 2019 Minglanilla Mayor’s Cup Summer League 21-under Bracket c basketball tournament nga gipahigayon sa Minglanilla Sports Complex niadtong Sabado.
Ang kadaugan nag-aswat sa Cuanos paduol ngadto sa sunod round nga may lima ka daog ug usa ka pildi ug sa samang higayon nagtukmod usab sa Tulay 2 ngadto sa peligrusong dapit nga may 3-3 nga baraha.
Sila si Jerechos Erediano ug Justine Castanares nangulo sa Tulay 2 nga may 15 puntos matag usa.
Sa Bracket B, gilubong sa Ward 4 ang Tunghaan 2, 91-76. Apan bisan pa sa dakong kadaugan sa Ward 4, pabilin nga wa gihapon kini kasiguroan alang sa sunod round sanglit aduna na kini upat ka pildi sa unom nila ka mga duwa.
Si Jay Balero mipaksit og 18 puntos, Ianniel Pueblo mihipos og 17 puntos alang sa Ward 4 nga nakakuha usab og 13 puntos gikan kang Florention Meoris.
Ang Tunghaan gitampohan nila ni Jeffrey ug James Rafeala og tag 15 ug 14 puntos.
Sa 39-below category, gilabni sa Boomstar ang ilang ikatulong sunodsunod nga daog batok sa Mac Sports Wear, 93-76.
Ang Boomstar nga may 3-0 nga baraha gipangulohan nila ni Sellote ug Bastida nga may 16 ug 13 puntos.
Subay niini, gipahibawo ni commissioner Geraldine Sedeno Canedo ug Commission Monching Cadiz nga ang Barangay Manduwang maoy mo-host sa mga duwa karong Sabado. (JBM)