UYON ko sa pipila ka mga kausaban nga giduso sa administrasyon sama sa pederalismo. Apan di ko uyon nga ipamugos ang ROTC.
Nakasabot ko ngano gusto ni Presidente Rodrigo Duterte nga mahimong mandatory pagbalik ang ROTC kun Reserve Officers Training Course.
Nagkinahanglan kita og dakong reserba labi na kon mangisog kita batok sa China tungod sa pagpangilog niini og teritoryo diha sa West Philippine Sea.
Kulang ang pagpamalit og mga modernong ekipo para sa gubat kon kulang kitag sundawo.
Ambot lang sab hinuon. Kay bisan pag magsundawo kitang tanang Pinoy, mas daghan man gihapon ang armed forces sa China.
Moingon sila nga importante ang ROTC aron pagtudlo og serbisyo sa katawhan ug gugma sa nasud.
Buot ba ipasabot nga way paghigugma sa nasud ang nikuhag NSTP?
Sa akong kasinatian dihang nag ROTC ko kaniadtong nagsugod ko sa kolehiyo, wa may hanaw kabahin sa nasyonalismo ang among mga ROTC officers. Di man gani makamao motinagawg, samot pa sa mga mithi ug saysay nga makapahigugma kanato sa nasud.
Ang nahibaw-an sa mga hanggaw mao ang pagpangulata sa mga ni-apply sa pagka NCO kay mao sab ilang naagian.
Tipik kuno kini sa prinsipyo nga obey before you complain.
Makamao sab sila unsaon pagpadugo sa mga gustong mopasakop sa service company ug kadtong gusto mopasar pero way tambong-tambong.
Buot ipasabot, dili love of country ang nakat-onan nako (gawas sa pag martsa-martsa ug alsa-alsa sa kahoy nga pusil-pusil). Akong naamgohan nga ang mga ROTC officials mga sadista ug hanas sa hazing. Mga kurap sab.
Kining akong baruganan tungod sa akong nasinati-an sa panahon nga nagkuha ko niini kay compulsory baya ang ROTC sa panahon sa diktadurya ni Marcos.
Ang maong diktadurya maayo kaayog record sa pangurakot ug paglapas sa tawhanong katungod.
Hinuon, posible sab gyud nga nausab na ang ROTC karon.
Bahalag makadungog gihapon kitag mga istorya kabahin sa pangurakot ug paglapas sa tawhanong katungod sulod sa militar ug sa kapulisan. Ibutang nato nga nareporma na kini.
Apan kinahanglan bang ipamugos ang ROTC? Ang pagkasundawo ba ang bugtong sukod sa serbisyo sa katawhan?
Panahon na karon nga tudloan nato ang kabataan unsaon paggamit sa ilang utok. Kining giingon nga critical thinking.
Wa kita pag-edukar sa atong kabataan aron mahimong mga yes-men og diktador. Tuyo nato ang usa ka katawhan nga nahigmata nga mahinungdanon sa usa k demokrasya. @anol_cebu sa Twitter