GUBOT. Ang kamatayon sa 44 ka Special Action Force (SAF), nga gimasaker sa Mamasapano, Maguindanao sa MILF ug BIFF, nahimo nga pabilo sa dakong gubot sa panggamhanan ni Pres. Noynoy Aquino. Gubot pas lukot ang kahimtang karon sa Presidente mao nga nagpakahilum na lang intawon morag bata.
Miawhag ang National Transformation Council (NTC) pinaagi ni retirado Cardinal Vidal nga pakanaugon si PNoy sa iyang pagka presidente tungod sa pagmasaker sa 44 ka membro sa SAF.
Naa pay Senado ug Kongreso nga nagpahimutang og ilang tagsa-tagsa ka imbestigasyon nga nahimo na hinuon nga circus ang sitwasyon sa Fallen 44.
Maayo gani kay si Bise Presidente Jejomar Binay duna pay nahabilin nga kaikog ug kauwaw kay di man siya uyon sa awhag nga pakanaugon ang Presidente. Hinuon, wa sad ta kahibawo kang nagpagoryo-goryo ra si Binay kay siya baya ang mopuli og mokanaug ang Presidente.
Pung pa ni Binay, “Akong gipangaliya ug ampo nga makalingkawas ang Presidente ning maong problema sa dali nga panahon.”
Matag usa kanato dunay katungod nga mosulti sa atong gibati. Apan, usa ko nga di makatuo nga naggikan sa baba ni retirado Cardinal Vidal nga pakanaugon ang Presidente sa way pus nga rason.
Si Cebu Arsobispo Jose Palma mibiya dayon human si retirado Cardinal Vidal namung sa medya sa baruganan sa NTC nga pakanaugon ang Presidente tungod sa mga panghitabo nga wa nay kontrolar ang ehekutibo.
Ang Archdiocese of Cebu pinaagi ni Msgr. Joseph Tan mibutyag sa Sun.Star Cebu nga si Arsobispo Palma dili mohatag sa iyang posisyon sa maong isyu tungod kay way katakus ang ministro sa Simbahan nga moapil sa pulitika.
Saludo ko nimo, Arsobispo Palma. Hinaut nga magpabilin ka sa imong pagtuo ug makahatag ka og ehemplo ngadto sa mga tawo nga gihunahuna ang ila ra nga kaugalingon.
Kining mga tawhana nga nagpaluyo sa NTC atong nailhan nga mga amigo ug dumadapig ni kaniadto Presidente Arroyo. Sa ato pa, di ta mahibung sa ilang gibarugan karon.
Sa wa pa moretiro si Vidal, gidayeg siya ug gianggaan nga “Prince of Peace” kay siya pirmi ang dangpanan sa mga lider sa kagamhanan kon dunay mga kagubot ug problema nga pulitika ug balaanon ang iyang mga tambag.
Klaro nga gigamit sa NTC si retirado Cardinal Vidal nga maoy misulti sa ilang awhag nga palayason si PNoy sa palasyo sama ni Erap kaniadto. Abi ninyo kon si kanhi Senador Kit Tatad pa ang gipasulti segurado ko nga way maminaw.
Sa akong pagkagamay, akong nakita ang katuyoan sa NTC nga ilang pakauwawan si PNoy agig bawos sa iyang paglutos ni kanhi presidente Arroyo. Sus, huwata na lang ninyo ang 2016 piliay oy ug pagbutang mo og inyong kandidato.
Ato lang ingnon nga tinuod-buot ang giingon ni Bise Presidente Binay nga di siya uyon nga pakanaugon si Pres. PNoy kay siya man unya ang mopuli og lingkod, unya kamo na nuon taga NTC ang magpakaaron ingnon nga makamuo sa sitwasyon. Hilom mo uy!
Ingnon tang pung nga dako ang sipyat ni Presidente Aquino sa operasyon batok sa terorista nga si Marwan ug Usman hinungdan sa pagkamatay sa 44 ka SAF, apan dili kini hingpit nga rason nga ato siyang pakanaugon.
Unya, kinsay ipuli? Si Zamboanga city Archbishop Romulo dela Cruz o si Lipa City Archbishop Ramon Arguelles? Pung pa sa akong maestro sa kolehiyo kaniadto “ayaw kog sultii.”
(freezone.ellie588@gmail.com)