ANG matag panghitabo sa kinabuhi, bisan sa tumang kalisod sa sinugdan, di lang nimo mahibaw-an nga maoy magsilbi nga yawe sa kalampusan.
Kinsay magtuo nga ang usa ka kabos gikan sa Barangay Anunang, Banzalan Davao del Sur, makatukod og dako nga kompaniya sa transportasyon alang sa turismo?
Si Mark Anthony Boyo napadpad sa Sugbo gikan sa Mindanao niadtong 1997 gumikan sa kapeligro sa ilang kinabuhi kaniadto tungod sa suliran sa insurgency.
Ang iyang inahan nga si Letecia nagtrabaho sa rattan factory dinhi samtang iyang amahan nga si Eduardo nakasulod isip security guard sa lugar nga karon gihimo nang IT Park.
Bisan nakatrabaho ang iyang mga ginikanan, nagbalhinbalhin og eskwela si Mark gikan sa barangay Paknaan sa Mandaue ngadto na sa Bais City sa Negros Oriental diin iyang nasinati ang pagdaogdaog sa iyang mga classmate kaniadto.
Mga diskarte
Di tiaw ang iyang naagian sanglit sa kalinghod sa iyang pangisip, naglukdo na siya og basket nga adunay sulod nga apple, orange, grapes ug lemonsito aron iyang ibaligya sa Mandaue City Hall ug Hall of Justice.
Iyang pang gisudlan ang trabaho isip shine boy, kanang tigpasinaw sa sapatos ni anhing Mandaue City mayor Alfredo “Pedong” Ouano.
Gawas sa pagka shineboy, namaligya usab siya og newspaper.
Kay dako ang iyang edad itandi sa iyang gituntungang ang-ang sa tunghaan, nikuha siya og placement test aron makatungha og high school.
Nakapasar dayon siya ug ni enroll sa high school sa University of the Visayas (UV) sa Mandaue.
Bisan siya nagtungha, nipadayon siya sa iyang mga sideline aron dunay ikagasto.
Gawas sa kalisod sa pagtungha, kanunay silang magbalhinbalhin og kapuy-an sanglit palayason sila sa tag-iya kay wa sila makaabang.
Sa samang panahon, nag-abang siya og P30 matag adlaw sa trysikad sa ginganlan og Roy ug mamasahero sa barangay Opao, Umapad ug Ibabaw Estancia nga nilungtad og usa ka tuig.
Wa magdugay, nikuha na sab siya og placement test ug nakapasar dayon ni-enroll sa UV para sa kolehiyo.
Aron dunay ikabawon. matag adlaw moadto siya sa Cebu Metropolitan Cathedral.
“Sa UV pa ko, atang ko diha sa Cathedral dili kay para mokaon ko, kon dili mohatod ko inig lubong sa patay kay daghan man mangitsa ana og sensiyo. Makapunit kog P100, ako na isuksok sa bulsa. Unya makapunit na pud ko mga P50, ako nanang ihatag sa namatyan. Everyday gyud to nako gibuhat kaniadto,” padayag ni Boyo.
Namasahero usab siya isip habalhabal driver sa bukiran sa Paril, Mabini, Cambinocot ug Lusaran hilabi na sa lawom nga kagabhion naron mohatod sa mga tawo nga gikan namuwang.
Naminyo
Iyang nahuna-hunaan nga di niya linya ang edukasyon, nibalhin siya sa Visayan Nazarene Bible College ug nikuha sa kursong AB Theology kay gustong mag-pastor ug ni-graduate.
Niadtong 2004, iyang nahimamat si Sheila Boquecosa, usa ka baptist nga karon nahimo na niyang asawa ug aduna silay anak nga si Schwartzy Magne ug talianak na usab iyang misis sa usa ka baby girl.
Wa siya nadayon sa pagkapastor ug nitrabaho isip tigbaligya og Encyclopedia.
Gawas niini, nahimo siyang ahente og motorsiklo sa wa pa siya nahimong security aide sa usa ka dakong negusyante sa Sugbo.
Tourist Transport
Samtang nagtrabaho siya isip bodyguard, nakapalit siya og Toyota Baby nga unang giabangan og P500 sa iyang higala para pasakyan og turista niadtong 2013.
Natayming nga gibaligya sa iyang kanhi amo ang upat ka vans ug duha ka bus.
Gumikan sa iyang kurso, iyang gipalit pinaagi sa pag-down og P100,000 ang usa ka unit ug gidatahan ang sobra.
Hangtod nga iyang napalit ang upat ka mga unit.
Iya na usab gisuwayan ang duha ka mga bus nga karaan nga hangtod nga niayo ang dagan sa iyang negusyo.
“Nothing to lose. Pobre bitaw ko. So, wala koy ikauwaw hangtod karon. Kon ugaling dili ko mo-succeed sa akong ambisyon sa kinabuhi kay gikan man ko sa pagkakabos,” sulti ni Mark sa iyang kaugalingon.
Wa pa siya matagbaw, nangita siya og paagi ug nilampos sa pagdata-data sa pito ka brand new vans.
“Nadungog na ang SMB. So, daghan na ang nagduda nga druglord kuno ko. Gipaadtuan nako og NBI (National Bureau of Investigation) kay kinsa kuno ko dali kuno kaayo niasenso kay daghan na og sakyanan unya pobre ra kaayo sa una,” dugang niya.
Iyang napamatud-an nga ang kakabos di diay babag aron makab-og ang mga damgo kon ubanan kini sa imong kakugi.