PORMAL nang nanumpa ang mga midaog nga kandidato sa Team Deretso sa kampo sa mga Radaza niadtong Sabado, Hunyo 1, atubangan sa ilang mga dumadapig sa Hoops Dome Barangay Gun-ob, dakbayan sa Lapu-Lapu.
Ang mga nanumpang opisyal nga midaog sa miaging midterm election naglangkob ni outgoing Lapu-Lapu City Mayor ug incoming Congresswoman Paz Radaza sa lone congressional district sa Lapu-Lapu ug ang 10 ka mga konsehal nga sila si; Marcial Ycong, Rico Amores, Jose Dungog, Rudy Potot, Queenie Malingin-Amman, Gregorio Paquibot, Rex Mangubat, Efren Herrera, Alexander Gestopa ug Flaviano Hiyas.
Samtang ang presidente sa Association of Barangay Council (ABC) President Eduardo Cuizon maoy mipapanumpa sa mga elected officials.
Gipahibawo ni Radaza gihimong sayo ang ilang oath taking kay aduna siyay daghang atimanon alang sa iyang hingpit nga paglingkod isip umaabot kongresista sa dakbayan.
Atol sa iyang pakigpulong atubangan sa ilang mga supporter mapasalamaton ang mayor sa suportang iyang nadawat human sa siyam ka tuig kon tulo ka termino niyang pag-alagad isip mayor.
Nanghinaot si Radaza nga dili makalimtan sa mga Oponganon ang mga kalambuan sa dakbayan isip usa ka Historic Resort City ubos sa iyang pagdumala.
Siya misaad nga magpadayon ang pag serbisyo sa katawhan. (GCM)