LAKIP nga duawon sa Land Transportation Office (LTO) sa Central Visayas ang mga tunghaan alang sa paghatag sa mga nag-unang serbisyo, pinaagi sa E- Patrol Bus o mobile LTO Bus.
Way rason nga dili makapa-renew sa drivers license ug maka-parehistro sa sakyanan ang mga magtutudlo o school official ug administration staff bisan ang mga tinun-an pinaagi sa bag-ong programa sa Mobile LTO Bus.
Ang LTO bus ang molibot karon sa mga siyudad ug nagkadaiyang bahin sa probinsya sa Sugbo ingon man sa Negros Oriental aron sa pag-accommodate sa mga hangyo sa publiko.
Ang buhatan sa LTO nakadawat og hangyo gikan sa mga school administrator sa mga unibersidad, kolehiyo ug uban pang tunghaan. Gani niadtong miaging semana duha ka unibersidad ang ilang naserbisyohan.
Gitug-an ni LTO-7 director, Emmanuel Victor Caindec, nga gisugdan ang maong programa niadtong Pebrero ning tuiga.
“We are going beyond sa opening of classes, among giseguro nga ang among E- Patrol bus nituyok sa nagkalain-laing munisipyo para matabangan namu nga ma-isyuhan og lisensya, makahatag og students license sa mga wala pay lisensya, pagtabang og renew sa ilang registration nga dili na kinahanglan pa nga moduaw sa primary offices,” pagpasabot ni Caindec.
Sukad nga gisugdan ang maong programa, dul-an na sa 8,000 na ka tawo ang nakapahimulos sa E-Patrol Bus base sa 27 ka mga LGU nga ila na naserbisyuhan.
“Ang amo gud target ani, aside sa mga local government units moadto mi sa mga government offices nga daghan og tawo, aron ang mga nanarbaho dili na moadto sa LTO, kami na ang moadto nila. Ang opisina sa LTO atong gisakay og bus,” dugang pasabot ni Caindec.
Lakip nga duawon ang courts aron malakip sab og serve ang court employees.
Nahisama sa usa ka outreach program sa LTO ang ilang pagsuroy sa mga government offices ug tunghaan aron nga kahatagan og kasayon ang publiko nga adunay tuyo sa LTO. (FMD)