GIBISITA sa igsuon sa hari sa Thailand ang Basilica Minore del Sto.Niño, dul-an duha ka tuig sa di pa ang ika-500 nga anibersaryo sa Kristiyanismo sa nasod.
Naabot si Princess Maha Chakri Sirindhorn, igsuon ni King Vajiralongkorn, uban sa iyang di mominos 50 ka royal guards Lunes sa buntag, Hunyo 3.
Si Fr. Ric Anthony Reyes, museum director sa Basilica, nihangop sa pagbisita sa prinsesa nga iyang labing una.
“Gibisita niya ang Basilica as part of appreciation sa ilang history class. I think it’s the history of our country especially sa atong lungsod and to appreciate also the growth of Christianity. Ang iyang giari mao gyud ang Basilica which is the center of Christianity diri sa atong nasod,” padayag ni Reyes
“Nindot kini kay nag remind kanato usab nga kining iyang pagbisita mao ang pagpahimangno kanato nga kitang tanan mo-appreciate sa atong cultural history at the same time sa atong pagtuo. Unya ang 500 years is also a celebration of faith, culture and history of our country since 1521,” dugang sa director sa Museum.
Gibisita sa princesa sa Thailand ang chapel diin nahimutang ang orihinal nga imahen ni Sr. Sto Niño aron masud-ong ang nawong sa Balaang Bata, niadto sa altar sa simbahan, niadto sa lawak nga nahimutangan sa Ecce Homo ug nisuroy sa Pilgrim Center aron makita ang facade ug ang museum.
Pagdayon og gawas sa compound sa simbahan, nagpahulagway ang Royal Princess atubangan sa Magellan’s cross. Ang pagbisita niabot og 70 minutos.
Ang Thailand usa ka Buddhist nga nasod kansang pagbisita mainiton nga gidawat sa mga Kristyano. (PAC)