PAGBUKAS sa klase sa Dakbayan sa Sugbo hapsay ug malinawon, gawas lang sa ginagmay nga mga problema nga nitumaw.
Si Superintendent Bianito Dagatan sa Department of Education (DepEd) Cebu City niingon nga adunay duha ka building sa City Central School para sa high school department nga wa pa mahuman.
Ang maong mga building adunay 12 ug walo ka classrooms, kansang construction giingong nagsugod pa niadtong 2016.
Ang 12 ka classroom layo pa sa tinuod nga mahuman samtang ang walo ka mga lawak nga edepisyo nahuman na og pintal apan wa pay kuryente, tubig ug jalousie.
Gumikan niini, ang mga bata gibahin sa tulo ka session, buntag, hapon ug gabii diin ang uban migamit sa makeahift classroom para maklasehan sa mga maestra.
Si Dagatan nikontak na ngadto sa engineering office sa Department of Public Works and Highways para mapaspasan og trabaho ug magamit na ang usa ka building sunod semana.
Si Dagatan wa mosulti unsay katarungan nganong dugay ang pagtrabaho.
Laing building nga wa mahuman mao ang 16-classroom building sa Mabolo Elementary School, apan dili sila apektado sanglit aduna pa silay sobra nga mga lawak.
Ang Barrio Luz Elementary School nahuman na unta ang building ug ready for occupancy na, apan ang contractor wa mo-turnover sa mga yawe.
Hinuon nasulbad ra usab kagahapon ang problema.
98% ang nitungha
Gibanabana ni Dagatan nga niabot og 98 porsyento ang nitungha kagahapon sa mga tinun-an sa kindergarten, elementary ug high school.
Gipanglantawan niya nga motunga sa eskwelahan ang dos porsiyento sa mosunod nga mga adlaw.
Matod pa ni Dagatan nga aduna gihapoy problema sa late enrollees nga maoy ilang tinuig nga problema.
Ang mga bata way mga credential ug sagad kanila nagagikan sa mga pribadong tunghaan.
Ang DepEd manawat og mga late enrollee gikan sa mga laing eskwelahan hangtod karong Hunyo o di mosobra sa 40 ka adlaw gikan sa opening sa klase.
Malinawon
Gihulagway sa kapulisan sa Central Visayas nga malinawon ang unang adlaw sa pag bukas sa klase.
Aron pagsiguro nga naa ang mga pulis ug adunay gipang montar nga mga police assistance desk, nangunay si Police Brigadier General Debold Sinas sa pag-inspeksyon sa silingan niining eskwelahan nga mao ang Abellana National School.
Gisusi niya kadtong gipang-ayo nga manhole lakip na ang hugasan sa mga kamot sa mga tinun-an ug ang mga lingkoranan.
Gipasalamatan pag-ayo ni Dr. Emelita Lanaria, school principal, ang gihatag nga abag sa Police Regional Office 7.
Way kabutangan sa iyang kalipay sanglit nahuman ang ilang gikinahanglan sama sa water and sanitation sa mga bata ug aduna pay saad ang PRO-7 Director nga motabang usab sila.
Way nabantayan nga problema ang tunghaan sa unang adlaw sa pagbukas sa klase gawas lang sa mga ginikanan nga nangasuko tungod kay wa sa listahan ang ilang mga anak.
“Dunay mga pangalan sa mga bata nga wala sa section list unya nasuko ang mga ginikanan with regards to classrooms and teachers kompleto mi,” matod ni Lanaria.
Samtang nagpadayon sa pagsusi si Sinas ug nangomusta usab siya sa mga bata.
Nabaling ang iyang attention sa usa ka boy scout nga taga Kamputhaw tungod sa kadaan na sa iyang sapot.
Iyang gimandoan ang iyang staff nga kuhaon ang pangalan niini aron mapalitan og usa ka set nga uniporme sa boy scout lakip na ang sapatos niini.