KABOMBEROHAN sa Dakbayan sa Carcar ipatawag sa konseho karong buntag gumikan sa giingong “palpak” nga pagresponde sa sunog nga niugdaw sa 11 ka balay niadtong Sabado sa alas 4 sa hapon sa Brgy. Guadalupe.
Si Kapitan Giovanne Barcenas sa Brgy. Guadalupe,nga nahinabi sa Superbalita Cebu, nagkanayon nga nasagmuyo sila ingon man sa mga residente gumikan sa kalangay sa mga sakop sa bombero pagresponde.
Hapit moabot og usa ka oras una pa naabot sa fire scene nga unta madala ra kini og mga singko minutos. Matod ni Barcenas nga wa siya makasabot kon unsay rason sa ilang kalangay sa pag-respondi nga di man unta layo ang ilang lugar gikan sa buhatan sa bombero.
“Pwerting pagkaduya nilang naabot. Ang gilay-on diri gikan sa buhatan sa bomebero, kon dali pa silang mi-respondi, layo ray 5 minutes abot na sila. Pero wala,” dugang ni Barcenas.
Ilang gi-awhag ang konseho sa Dakbayan sa Carcar nga ipatawag gyud ang mga sakop sa bombero nga gipanguluhan ni Captain Puno, aron ilang mapasabot sa katawhan sa Carcar ingo man sa mga residente sa Brgy. Guadalupe.
Niabot tuod ang duha ka fire trucks,gubaon pa ang ang water pump sa usa niini. Maayo nalang kay naabot sab ang mga bombero sa Baririli, San Fernando ug Argao.
Si Barcenas niklaro nga kon dali lang unta kaayo ang responding team sa Carcar dili unta mahurot sa pagka-ugdaw ang 11 ka balay kay matabang pa. (GPL)