PROBLEMA sa ilegal nga drugas sa Central Visayas wala pa hingpit nga masulbad matud sa hepe sa Police Regional Office Central Visayas bisan sa sunod-sunod nga anti-drug operation nga gihimo sa kapulisan nga angayan nga pakusgan pa ang ilang kampanya.
Human masakmit sa Cebu City Police Office ang kapin P16 Million nga balor sa ilegal nga drugas atol sa 48 oras nga one-time big-time operation niadtong miaging semana, nagtuo si Police Brigadier General Debold Sinas nga dako pa kaayo ang problema sa ilegal nga drugas sa rehiyon 7.
Matod ni Sinas nga ang nakuha sa kapulisan sa Siyudad sa Sugbo nagpamatuod lang unsa ka daghan pa ang suplay nga mangabot sa Central Visayas.
Hinuon nakita niya nga aduna na'y kalahian sa nanglabay nga mga buwan diin binulto nga shabu ang ilang makuha, karon giputos na kini sa ginagmay nga mahimo nang mabaligya sa ilang mga customer.
“Buot ipasabot, daghan pa gihapon. Imagine kadtong sa station 11, 1.6 kilos tapos ang katingala lang namo wala natong bulto-bulto kanang ready for dispatch na. Na-timing lang gyud sa atong mga police nga nakuha,” sigon ni Sinas.
Giangkon ni Sinas nga ang drugas gikan sa Luzon ug gipadala sa siyudad ug lalawigan sa Sugbo pinaagi sa mga roro vessel.
Apan nasuta nga ang middleman naa sa sulod sa bilangguan nga mao usab ang motawag sa ilang mga contact sa kaulohan ug sa mga gustong mo palit sa ilegal nga drugas dinhi sa Sugbo.
Tungod niini, gilauman nga aduna'y sunud-sunod nga operasyon uban ang mga personnel sa Bureau of Jail Management and Penology Central Visayas ug sa Philippine National Police batok sa mga drug personalities nga naa sa bilangguan pinaagi sa greyhound operation.
Natingala ang heneral nganong padayon nga makatawag ang mga drug pusher nga nabilanggo sa ilang contact sa gawas.
Kapin sa duha ka kilo nga gituohang shabu ang nasakmit sa mga sakop sa CCPO niadtong miaging semana atol sa synchronized enhanced managing police operation.