ANG kalisod sa pagsulbad sa pagpamalit og boto kun vote buying tungod sa kakuwang sa ebidensya kaniadtong eleksyon ang usa sa mga nakit-ang problema sa gihimong midterm election critic seesion sa Police Regional Office (PRO) Central Visayas Martes, Hunyo 4, 2019.
Gihulagway sa Commission on Elections (Comelec) nga hapsay ug tunhay ang milabay nga midterm national and local elections niadtong Mayo 13, diin miabot sa 81 porsiyento ang mibotar sa tibuok rehiyon 7.
Matud ni acting Comelec Regional Director Attorney Veronico Petalcorin nga kon aduna may mga kakulian nga nahitabo atol sa piniliay, ginagmay lamang kini nga dali ra usab nga natubag sa ilang buhatan.
Ang Central Visayas nabutang sa ikatulo nga dapit lukop nasud nga adunay taas nga voting turnout nga una nang gituohan sa Comelec nga mahitabo.
Kontento ra usab ang Comelec sa gihatag nga siguridad sa kapulisan ug mga sundalo panahon sa eleksyon tungod aduna'y daghang mga pulis nga gipakatap sa nagkadaiyang mga polling centers.
Matud ni Police Brigadier General Debold Sinas nga sa kinatibok-an ang PRO Central Visayas mao usa sa labing maayog performance sa lukop nasud diin nabutang sa ikaupat nga dapit.
Hugot nga gihimakak ni Petalcorin ang pamahayag sa usa ka naparot nga kandidato sa Dakbayan sa Sugbo nga ang pagkunhod og 6 porsiyento tungod sa gihimong harassment sa kapulisan sa mga bukirang barangay.
Matud sa acting Regional Director sa Comelec nga daghan ang hinungdan niini sama pananglitan sa pagbalhin sa usa ka botante sa laing dapit o wala lang gyud ganahi mobotar ang usa ka residente.
Giangkon usab ni Sinas nga ang usa sa problema sa piniliay mao ang vote buying tungod kay lisud kini nila nga napugngan.
Aduna tuod sila'y gipang sikop apan gipabuhian ra sa korte tungod kay wala nila ma matud-i nga kini namalit og boto, nga usa sa ilang sulbaron sa mosunod nga eleksyon.
Human sa piniliay niadtong Mayo 13, ang mga nasikop sa Philippine National Police nga gipasanginlan nga nag-vote-buying ang gipabuhian tungod sa kakuwang og ebidensya kanila. (AYB)