GITAKDANG mapalit karong tuig 2019 ang makina nga maoy moproseso aron nga mopatay sa mga kagaw ug uban pa nga gikan sa mga basura sa mga ospital, laboratories ug klinik nga dunay mga hazardous waste o delikadong mga basura.
Sa kasamtangan wala pa ang maong makina nga nagkantidad og P50 milyones diin ipadala pa sa Davao o Cebu ang mga hazardous waste.
Giingong dako og gasto ang pagpadala niini ilabi na nga magbayad pa og transportasiyon diin anaa sa P45 matag kilo ug laing balayrunon sa pagproseso sa ekipo hinungdan nga dako og tabang ang nahisgutang makina.
Sa pakighinabi kang Engr. Armen Cuenca, ulo sa City Local Environment and Natural Resources (Clenro), nibutyag siya nga duna nay gigahin nga pundo alang niini ug gitakdang mapalit na karong tuiga.
“I-bidding, within the year paliton actually naa nay proposal, kanang P50 million is only one machine,” matud ni Cuenca.
Gidugang pa nga makaproseso kini og anaa sa 70 ka kilo matag oras nga planong ibutang lang usab sa sanitary landfill.
Giingong makina kini nga mopatay sa mga peligrong bakterya nga dala niining maong mga basura.
“Technology siya nga ang basura nga gikan sa hospital nga mga toxic iyang i-process nga pamatyon tong mga virus katong mga bacteria dayon iyang pinuhon nga mura ra dayon siyag yuta,” dugang ni Cuenca.