NGILNGIG ang kamatayon sa mag-amahan human gitigbas sa silingan niadtong Lunes, Hunyo 3, sa Barangay Pungol, lungsod sa Libona, Bukidnon.
Si Police Captain Dino Cuevas, hepe sa Libona Police Station, miila sa mag-amahan nga sila si Eddie Baculio, 46, ug anak niining si Jayson, 26.
Gitumbok nga suspetsado mao si Teddy Baguio, 36, residente sa dapit.
Matud ni Cuevas nga buntag pa dihang nagbikil na ang duha gikan sa sabungan.
Pagkahapon niadtong Lunes, kalit lang nga gisundan sa mag-amahan si Baguio.
Si Eddie adunay bitbit nga improvised shotgun samtang ang anak niini nga si Jayson dunay bitbit nga bolo.
Giiingon sa mga nakasaksi nga nangsinggit-singit ang mag-amahan ug nanghagit kang Baguio hinungdan gikuha niini ang iyang double blade nga sundang.
Tungod niini, gipabuthan ni Teddy og shotgun apan wala mibuto hinungdan nakahigayon si Baguio nga tigbason kini maong hapit maputol ang liog sa amahan.
Gisundan ug tigbas ang ulo niini ug likod lakip ang kamot hinungdan sa pagkaputol.
Si Jayson nga misukol sab kang Baguio nakaangkon sab og nagkadaiyang samad tinigbasan sa iyang lawas nga dihang gidala sa tambalanan sa dapit apan nakabsan sa kinabuhi human nahutdan og dugo.
Si Baguio nakaangkon sab og mga samad tinigbasan ug anaa karon gidala sa Northern Mindanao Medical Center.
Matud ni Cuevas nga panahon makagawas sa tambalanan molanding gihapon kini sa prisuhan tungod sa dili tiaw nga krimen nga nahimo niini.
Dili pa matumbok kung unsay gilalisan sa duha ka parte apan giingong daan na kini sila awayon nga silingan ug gitouhang dumot gyod ang motibo.