DEAR Atty. Joan,
Ako diay si Roda. Mangutana lang unta ko. Naa koy kaila nga batan-on ba nga nag-edad og kinse anyos man nasakpan nga nag-shop lifting pag 2015.
Pero ang kadtong kasoha kay nastoryahan sa ra sa duha ka partido pero naabot sa DSWD ang kaso. Karon 2019, kay byante anyos na siya ug ganahan siya mungtrabaho. Magkuha unta siya og NBI ug police clearance, makakuha ba siya?
Roda
Dear Roda,
Giingon sa atong balaod nga ang tanan rekord ug proseso nga adunay kalambigitan sa kabataan nga nakalapas sa balaod kay gikonsiderar nga kompidensyal. Kompidensyal ni gikan palang sa sugod hantud mahuman ang proseso.
Makakuha ra og NBI ug police clearance ang imong kaila. Ang iyang rekords kay dili pwede magamit batok sa iyaha. Magamit ra ni kon mapuslanon ni sa iyang kahimtang. Hinaot kani kay nakatabang sa imoha.
Atty. Joan
Pahibalo: Kini opinyon lamang nga nag-base sa inyong lakbit-saysay ug kini pwede nga mausab kun dugang pa nga mapatin-awan ang mga detalye. Kon adunay pa kamoy mga pangutana nga adunay kalabutan sa katungod sa mga bata, mahimo kamong mo-message sa among Facebook account sa CLBI.