LUNES. Alas sayis sa buntag. Naglungotlungot ang galamhan ni Novie sa kalagot nga milingkod tungod sa lamesa nga iyang buhatanan sulod sa ilang balay. Sa miaging Sabado sa buntag nadiskubrehan niya nga nawala ang iyang ‘ruler’ nga stainless. Gamit kini niya sa paghiwa-hiwa og bond paper aron himuon og note pad. Gamit kaayo niya ang ruler tungod sa iyang trabaho nga nagkinahanglan og linya kanunay sa papel, sama sa pag-double rule sa mga ‘total amount’ sa ‘Income Statement’ ug ‘Balance Sheet.’ Usa siya ka CPA ug may mga papeles nga dad-on niya sa balay kon di niya mahuman sa opisina.
Way lain siyang suspek nga maoy nagkuha sa iyang ruler gawas sa ilang labandera nga entresale ra sa ilang balay. Single Mom si Myrna ug may tulo ka anak nga lainlain og amahan. Hayiskol na ang panganay; ang duha anaa pa sa elementarya. Piho nga naibgan ni Myrna ang ruler nga sidlak para sa iyang anak.
Nakamatikod si Novie nga may nagpuyo sa ilang balay nga dili ingon nato. Dos andanas ang ilang balay. Ang sala, kusina, banyo ug kan-anan naa sa silong. Ang lawak-katulganan nilang Celsa, iyang kapikas, tua sa itaas. Sila na lang duha ang nagpuyo sa balay kay nangaminyo na ang duha ka anak nilang mga lalake.
Kada alas singko sa buntag inigkanaog niya aron maligo, may mosunod kaniya pagkanaog nga di makita. Tunob lang niini ang iyang madungog. Inigsaka pod niya dayong matulog, may mosunod sab kaniya nga di makita.
Si Celsa may tindahan og sarisari. Sa panahon nga siya rang usa sa balay daghan siyang mamatyagan nga kahibulongang hitabo. Kadaghan na siyang nakamatikod nga molihok ang palid sa pultahan nga daw may miagi.
“Kamong mga di-ingon-namo dinhi, giisip ko kamo nga akong mga higala,” nagyawyaw si Novie nga mao rang usa. “Kon di mo makighigala nako, way igong rason nganong magpabilin mo dinhi. Kay higala man ta, magtinahangay ta. Gusto kong magpakita mo nako aron magka-estoryahay tag tarong. Gusto kong magtinabangay ta. Kon duna moy isugo nako, sultihi ko aron pagsuta kon mabuhat ba nako. Pero may ihangyo ko ninyo. Nasayod ko nga nakakita mo sa nagkuha sa akong ruler. Ayaw siya pakatulga kon di niya iuli ang ruler.” Nag-atubang siya sa palid sa pultahan nga kasagaran maoy palihukon sa di-ingon-nato. Alas siyete pa man mobangon si Celsa.
Kada adlawng Biyernes manglaba si Myrna. Iyang hakuton ang mga bulingong sapot nga gibutang na daan sa mga bandi.
Nianang pagka Biyernes sa buntag sayo nga mianha si Myrna sa ilang balay ni Novie.
“Sir, ako ning iuli nimo. Nakit-an sa akong anak sa daplin sa karsada. Imo kuno ni,” ni Myrna nga nagtunol sa ruler kang Novie.
“Salamat, Myrna, sa imong pag-uli ini,” ni Novie nga nagpahiyom. Nakita niya nga nanglagom ang mga mata ni Myrna nga wa kaharong pagtutok kaniya. Sa iyang tan-aw, morag nagbilar si Myrna og lima ka gabii.
Midali si Myrna pagsaka sa itaas aron paghakot sa mga labhanan.
Nagpahiyom gihapon si Novie nga mihunghong sa palid sa pultahan, “Salamat ninyo, mga higala!” (KATAPUSAN)