BORONGAN City, Eastern Samar - Namatay ang usa ka babayeng sakop sa New People’s Army (NPA) atol sa engkwentro tali sa Philippine Army.
Kini nahitabo sa Sitio Bagong Bario, Barangay Pinanag-an ning siyudad alas 7:30 sa buntag niadtong Huwebes, Mayo 30, 2019.
Ang kasundalohan sa 14th Infantry Battalion pinangulohan ni 1st Lieutenant Bayeng nagpahigayon og focused military operation.
Ilang nadiskubrehan ang usa ka kampo sa mga rebelde, diin ilang nakaengkwentro ang kapin kun kulang 50 ka mga NPA.
Niabot og usa ka oras ug tunga ang pinusilay sa duha ka grupo nga niresulta sa pagkamatay sa usa ka sakop sa NPA.
Wa pa mailhi ang namatay nga rebelde.
Narekober sa kasundalohan ang duha ka magazine sa AK47, duha ka RIG, usa ka bala sa M203,15 ka backpacks, mga tambal, tulo ka blasting caps, lima ka cellphones, usa ka timer, mga bala sa AK47, M16 Armalite rifle ug Garand rifle.
Duna usay importanteng mga dokumento nga makatabang sa imbestigasyon sa kasundalohan.
Matod sa 14th IB, sa una pa ang engkwentro daghan na sila og nadawat nga impormasyon gikan sa mga residente nga dunay mga armadong tawo sa lugar nga nihimo og extortion.
Niini, gilusad sa kasundalohan ang usa ka operasyon. (JKDP)