'Asset' gipatay sa 'bata-bata' ni Kerwin

ORMOC City, Leyte - Kawani sa lokal nga kagamhanan ning siyudad gipusil patay sud sa classroom sa iyang asawa.

Suspek giingong gaway sa usa ka self confessed drug lord, nadakpan na kaniadto ug napriso sa kasong illegal drugs.

Giila ang biktima nga si Beinvinido Casimiro, 42, sakop sa civil security unit, taga Barangay Mabini ning dakbayan.

Samtang ang suspek giilang mao si Ronnie Pocson, 46, nagpuyo sa samang barangay.

Ang pagpamusil nahitabo sa classroom sa Barangay Mabini Elementary School, alas 4:40 sa hapon, Dominggo, Hunyo 2, 2019.

Base sa inisyal nga imbestigasyon, nitabang si Casimiro sa paglimpyo sa classroom sa iyang asawa.

Samtang siya naglingkod, niabot si Pocson ug gipusil si Casimiro sa makadaghang mga mga higayon hinungdan sa iyang hinanali nga kamatayon.

Nisibat si Pocson human sa insidente. Personal nga kasuko ang gituohang motibo sa pagpamusil.

Si Casimiro giingong asset sa Anti Drug Group sa kapulisan samtang ang suspek kanhi batos ni Eastern Visayas self-confessed drug lord Kerwin Espinosa.

Gani si Pocson usa sa mga nasikop sa anti drug operation sa Cebu City Police Office niadtong 2010 ug giingong body guard kini sa usa ka pulitiko.

Nakagawas si Pocson human nakapiyansa sa kasong illegal possession of firearms.

Padayon pa gihapon ang imbestigasyon ug pagpangita kang Pocson.

Wa pa usab masayri sa kapulisan kon si Pocson nagpadayon pa ba sa illegal drugs.

Si Kerwin nabilanggo human pasakaig mga kaso sa iyang pag-angkon nga siya drug lord.

Iyang gilambigit ang Sugboanong negusyante nga si Peter Lim, kinsa wa na masayri kon hain na sukad nigawas ang warrant of arrest batok kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph