WAY balay o luna nga gipanag-iya og pribadong indibidwal sa Dakbayan sa Lapu-Lapu ang maapektohan sa katukoran sa ikaupat nga Mandaue-Mactan Bridge. Hinuon dunay pipila ka mga restaurant ang mangaigo niini sa habig sa Lapu-Lapu City. Mao kini ang gipaniguro sa kadagkuan sa Department of Public Works and Highways (DPWH) atol sa gipahigayong public hearing alang sa naasoyng proyekto sa session hall sa Lapu-Lapu city hall nga gitambongan sa mga Oponganon, nga nangabalakang maapektuhan. Atol sa public hearing, gipahibawo ni Engr. Nonito Paylado, chief sa planning division sa DPWH, nga tulo ka mga lugar o rota sa taytayan ang gipilian unta nila uban ang Japan International Cooperation Agency (JICA) base sa ilang feasibility study nga gihimo. Apan mas gipili nila ang lugar nga menos ang maapektohang mga lumolupyo ug establisemento. Ang ikaupat nga taytayan nga magdugtong sa dakbayan sa Mandaue ug Lapu-Lapu manukad sa tiilan sa may Cansaga Bay Bridge habig sa Mandaue sa Brgy Paknaan. Mosumpay kini sa dalan padung sa Mactan Cebu International Airport sa Brgy Pusok ug Ibo sa Lapu-Lapu City. Mao usab kini ang napanglantawan nga magpaluag sa trapiko sa Dakbayan sa Mandaue, Lapu-Lapu ug kasikbit nga mga lungsod sa amihanang bahin sa lalawigan sa Sugbo. Kabahin sa taytayan mao ang lutsanan unya alang sa mga motoristang dili molahos sa airport ug mogawas sa Brgy Pusok. Mga lutsanan Aduna usab kini mga lutsanan sa habig sa dakbayan sa Mandaue hilabi na nga gikatakda kining isumpay sa giplanohan usab nga Mandaue Coastal Road nga moagi ilawom sa unang duha ka taytayan sa dakbayan sa Mandaue ug Lapu-Lapu. Motadlas kini sa mga coastal barangay sa Mandaue sa dili pa kini modugtong sa ikaupat nga taytayan. Matod ni Paylado nga way residente sa Brgy Ibo ug Pusok ang maapketohan sa pagtukod sa naasoyng taytayan. Apan adunay mga establisemento, kasagaran niini mga kan-anan nga iya sa Marina Mall ug sa laing kasikbit nga patigayon sa Philippine Economic Zone Authority (PEZA) ang gikatakdang mapahakan gumikan kay maigo sa naasoyng taytayan. Ang maligsan nga mga estraktura gikatakdang bayran og insakto base sa latest market value unya niini pasalig sa DPWH. Daghan sa Mandaue Sa habig sa Mandaue napanglantawan nga adunay daghang maapeketuhan nga mga lumolupyo ug establisimento nunot sa katukoran sa Mandauae Coastal Road nga moagi sa Brgy. Centro, Looc, Opao, Umapad ug Paknaan. Sa bana-bana sa DPWH, moabot sa 104 ka mga balay ug 28 ka mga establisimento ang maapektohan sa naasoyng proyekto. Ang naasoy unyang taytayan adunay gitas-on nga 3.2 kilometros. Kon way kakulian, planong masugdan ang naasoyng proyekto sa uwahing bahin sa 2021. “We are trying to obtain the most feasible option in terms of all criteria considered, social impact, cost, economic contribution, traffic decongestion so this is the most feasible option nga na-determine sa JICA consultants,” matod ni Paylado. Si Architect Vincent Degamo sa Coral Point Properties nga maoy usa sa maligsan sa taytayan sa habig sa Dakbayan sa Lau-Lapu adunay gamay nga pangutana. Nangutana siya sa ka-epektibo sa proyekto pagsulbad sa trapiko sa dapit sanglit duol ra kaayo kini sa Marcelo Fernan Bridge. Gawas nga mapahakan ang ilang establisimento, ang pagtukod usab unya sa proyekto makabalda sa ilang mga kustomer. “Of course 5 to 7 years yun traffic. The customer will be distracted. So, the customer will be thinking hindi na kami kakain dyan kasi madumi, like that,” matod ni Degamo.