CEBU Provincial Board member Yolanda Daan sa unang distrito sa lalawigan sa Sugbo maoy nigawas nga number one sa ranking sa tanang mga nakadaog nga sakop sa Hunta Probinisyal sa nilabay nga eleksiyon niadtong Mayo 13.
Ang labing taas nga percentage votes maoy gibasehan sa Commission on Elections (Comelec) sa paghan-ay sa ranking.
Gipadala na sa Cebu Provincial Comelec ngadto sa buhatan sa Sangguniang Panlalawigan secretary ang opisyal nga ranking sa mga nakadaog nga board members.
Nag-una sa ranking si Daan nga dunay 46.96 vote percentage ug nihipos siya og 202,810 ka boto sa first district nga dunay 431,872 kinatibuk-ang ihap sa mga rehistradong botante.
Matod sa election assistant Ronnie Amistoso nga aron makuha ang vote percentage nga basehan sa ranking, ilang gigamit ang formula nga votes garnered per district divided by total number of registered voters.
Tungod sa pag-angkon ni Daan sa number 1 ranking, siya ang mamahimo nga presiding officer pro tempore sa Hunta Probinsiyal.
Ang presiding officer pro tempore maoy mohulip sa bise gobernador isip presiding officer sa sesyon sa higayon nga dili kini makatambong.
Siya sab ang mamahimong acting vice governor kon mag-leave o mo-absent sa taas nga panahon ang bise gobernador ug mohulip sa higayon nga mahitabo nga mamatay ang bise gobernador.
Mapasalamaton si Daan sa maong kalambuan diin nagbunga ang iyang subsob nga pagpangampaniya sa nagkadaiyang dapit sa distrito.
Matod niya, daghan ang nagduda sa iyang kapasidad isip board member apan gipaniguro niya nga padayong magkat-on, ilabi na kay nadugangan karon ang iyang mga responsibilidad.
“Daghan gyud kaayo’ng mga bati (nga komentaryo) ba, naay mo-ingon nga dili na mi pabotohan, ako committee on silence. So akong gikuan (gipasabot) sa pulong-pulong nako nga dili ko boang nga magpa-reelect ug wa koy nahimo sa Kapitolyo,” dason sa opisyal.
Nagsunod kang Daan sa ranking mao si Bokal Tata Salvador sa ikaduhang distrito nga dunay 43.46 vote percentage ug ikatulo si Bokal Jerome Librando sa 7th district nga dunay 43.34 vote percentage.
Si Salvador nakakuha og 70,149 ka mga boto sa distrito nga dunay 161,412 ka mga rehistradong botante samtang si Librando nakakuha ug 67,900 kamga boto gikan sa distrito nga dunay 156,665 ka mga rehistradong botante. (AZLG)