SECTIONS
Saturday, August 24, 2019
SUPERBALITA CEBU

Provincial Resource Center babagan ni Governor-elect Garcia

TORRE NI DAVIDE: Hayan di mahinayon ang katukoran sa 20 ka andana nga Cebu Provincial Resource Center o giila nga ‘Torre ni Davide’ sa dihang si Governor-elect Gwen Garcia dili uyon nga kini ipadayon sa kabalaka nga masinati ang economic loss sa Probinsiya. (Allan Cuizon)

KAPIN sa tulo ka semana sa dili pa molingkod si Governor-elect Gwendolyn Garcia sa Kapitolyo mipasidaan kini ngadto ni outgoing Gobernador Hilario Davide III ug sa contractor nga dili ipadayon ang katukoran sa P1.3 bilyones nga Cebu Provincial Resource Center.

Base sa managlahing suwat nga pinitsahan og Hunyo 3, 2019, si Garcia pinaagi sa iyang manlalaban ug miyembro sa transition team Frank Eduard Dinsay V, nipadayag sa iyang katuyoan nga ang pagtukod sa 20 ka andana nga edipisyo dili kabahin sa programa sa iyang pangagamhanan ug wa kini miuyon sa proyekto.

“While you may justify the on-going earth works to be within your administration’s term of office and therefore your prerogative as the incumbent governor, prudence dictates that you immediately discontinue the project bearing in mind the irreversible economic loss that the said works will entail...” tipik sa suwat alang kang Davide nga pirmado ni Dinsay.

Sa buwag nga suwat alang kang Willy Te, bise-presidente sa WT Construction, Inc., gipasidan-an ni Garcia pinaagi sa laing manlalaban ug miyembro usab sa transition team, Marino Martinquilla nga ipatuman ang cease and desist sa maong proyekto.

“It has come to our knowledge that despite the stern warning of Governor-elect Garcia, you persist in continuing the ‘Torre ni Davide’ project knowing fully well that such insistence would cause substantial economic loss to the Province of Cebu and to your company once she assumes the Office of the Provincial Governor of Cebu,” suwat ni Martinquilla.

Ang maong suwat magsilbi nga final notice sa WT Construction nga dili ilhon ni Garcia ang contract agreement tali sa contractor ug sa kagamhanan sa lalawigan sa Sugbo nga pinitsahan niadtong Pebrero 15, 2019 sa higayon molingkod kini sa katungdanan.

Si Dinsay nagkanayon nga mas maayo nga di ipadayon sa WT Construction ang pagtrabaho sa proyekto aron di na kini makagasto og dako.

Sa suwat, si Garcia nipasidaan usab sa tanang department heads nga dili i-process ang bisan unsa ug tanang billings kabahin sa proyekto.

Ang mga suwat gihatod sa transition team ni Garcia sa buhatan ni Davide sa Kapitolyo, niadtong Hunyo 3.

Kini gilangkoban sa batan-ong Dinsay, iyang uyoan nga si manlalaban Manolette Dinsay ug Martinquilla.

Ang SunStar Cebu nitawag sa WT Construction alang sa iyang habig, apan dili kini available sa pagkutlo ning balita.

Si Davide ug ubang mga opisyal sa Kapitolyo nga gipasakaan og injunction suit ni Garcia sa korte sa siyudad sa Toledo niadtong Marso 26 nakaduso na sa ilang tubag.

“(On another point,) the signing and execution of the contract with the winning bidder for the implementation of the project, after the completion of the bidding process in accordance with the law, is a valid and legitimate exercise of (respondent Gov.) Davide as the local chief executive (of the Province) and head of the procuring entity,” tipik sa tubag sa Kapitolyo.

Si Davide nga nagbase sa desisyon sa en banc sa Korte Suprema niadtong 2008, niingon ang pagpangayo og pagtugot sa Provincial Board sa pagsud og kontrata tali sa nidaog nga bidder ang wala na kinahanglana sanglit ang proyekto “already identified and specified with sufficient detail” ubos sa giaprobahan nga appropriation ordinance niadtong Hunyo 2018.

Gawas ni Davide, apil sa gipasakaan si outgoing Vice Gov. Agnes Magpale, Provincial Administrator Mark Tolentino, kinsa ang pangu sa Bids and Awards Committee (BAC), contractor WT Construction Inc. ug ang Development Bank of the Philippines (DBP). (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph