LIMA sa 27 ka mga ihawan sa Dakbayan sa Sugbo irekomendar sa Department of Veterinary Medicine and Fisheries (DVMF) ngadto ni outgoing Mayor Tomas Osmeña nga sirhan.
Ang kasayuran gipahibawo ni Dr. Alice Utlang, pangulo sa DVMF, human iyang gipatawag ang mga operator og slaughter house para mapalambo pa ang nga ihawan ug mapahibawo sa ilang gihimo nga assessment ug evaluation.
Tumong niini nga ang moabot nga karne sa merkado limpyo.
Si Utlang nagkanayon nga nahimutang ang maong mga ihawan sa mga Barangay Capitol Site, Labangon,Mambaling, Banilad ug Mabolo.
Iyang gihulagway nga way mga estruktura o building ug ang pasilidad wa makapasar sa standard.
Wa hinuoy mga report nga nadawat ang buhatan ni Utlang nga naglain ang tiyan sa tawo human nikaon og litson gikan sa maong mga ihawan.
Apan iyang gihulagway nga di sila angay magpadayon sanglit nahisupak sila sa balaod.
Aduna say laing pito ka mga ihawan nga gitugotan nga maka-operate bisan kon dili pa standard ang ilang kagamitan sanglit nisaad kini nga paninduton ang ilang estruktura ug kahimanan sa operation.
Ang Cebu City adunay tulo ka Double AA nga classification sa slaughter house diin ang mga baboy lakip na ang manok mahimong mabaligya bisan asa sa nasod.
Ang Double A nagpasabot nga ang maihaw nga mga hayop mabaligya diha sa lokalidad. Si Utlang niingon nga naila ang Sugbo sa dekalidad nga litson.
Apan ang mga ihawan wa motugma sa kalidad sa produkto nga maoy buot niyang molambo sanglit ilang prayoridad mao ang kaluwasan sa konsumidor.
Ang head sa DVMF niingon nga kadtong gusto nilang ipasirado pulos “0” ang score.
Buot ipasabot way estruktura ug way klarong kagamitan sa pag-ihaw diin posible nga maapektuhan ang kalimpyohon sa produkto nga maoy gilatid sa National Meat Inspection Service.
Ang DVMF ug personnel gikan sa NMIS nipahigayon og assessment ug evaluation sa 27 ka mga ihawan sa Dakbayan sa Sugbo niadtong Abril niining tuiga.
Si Utlang nihulagway nga bisan pa sa pagsirado sa maong mga ihawan, di kini makaapekto sa suplay sa karne sanglit aduna pay daghang ihawan nga nakapasar sa standard gawas atong gihatagan nila og konsiderasyon nga palambuon ang ilang slaughter house.
Giawhag niya kadtong mga supplier og karne nga adto mopaihaw sa mga akreditadong ihawan aron mahimong legal ang ilang pagtumod sa baboy ug di masakmit sa mga otoridad isip hot meat. (PAC)