SUKAD milihok ang kapulisan ug uban pang ahensya sa gobyerno batok sa mga investment schemes sa rehiyon diin nasuta nga dunay 53 ka mga investment companies ang nagdawat og investments ug dunay 14 na kanila ang nanirado na, nahasol ako ug halos tanang oras nako nagamit sa pagtubag sa daghang pangutana sa akong mga amigo nga naka-pay in.
Nagsugod ang ilang pagpangutana dihang akong gi-post sa Facebook ang balita sa Sun.Star Davao Superbalita nga ang headline: 14 ka investment companies nanirado na.
Kadaghanan kanila nangutana kung unsay pangalan sa mga investment companies nga nasira aron di mailad ang mga tawo. Ug ako sab silang gitubag nga bisan nasayud kami (media) sa pipila ka mga investment companies, apan among girespeto ang hangyo sa otoridad nga di una kini ipahibalo sa publiko.
Nganong gitago una ang pangalan sa mga investment companies sa otoridad? Kini tungod kay duna pay himuon nga lawom nga imbestigasyon ug operasyon batok ning mga kompanyaha.
Dihang akong gisusi ang post sa Facebook sa Superbalita, grabe ang mga komento sa mga netizens nga nagyawyaw ngadto sa among mga kauban sa buhat. Nagkadaiya ang ilang mga komento labot sa maong mantalaan.
Buot lang namo nga klaruhon nga ang media igo ra mobalita sa makalap nga impormasyon gikan sa mga otoridad. Kung duna may impormasyon nga di mahimong ipagawas sa balita tungod kay duna pay imbestigasyon, nan, amo kining respetuhon.
Duna pay nagyawyaw nganong di interbyuhon ang mga tagdumala sa investment companies? Angay sab masabtan nga dunay limitasyon ang mga sakop sa media, ilabi na nga idlas pa sa manatad kining mga tawo nga nagpaluyo sa investment companies.
Natural nga di sila magpakita tungod kay illegal ang ilang operasyon. Kung duna may moatubang sa otoridad, ila lamang mga bata-bata ug di gyud ang ilang Chief Executive Officer. Sama sa nahitabo sa duha ka mga investment companies nga gipasirhan dinhi sa Davao City, di ba walay opisyal nila nga miatubang?
Sa mga nagyawyaw nganong kanunay ibalita ang investment schemes nga nakatabang man kini sa mga tawo, angay ninyong masabtan nga gihimo lang sa media ang trabaho nga paghatud sa tinuod nga balita sa publiko.
Di kini pagpanghilabot kundi mao lamang ang pagpahibalo nga dunay mga balaod nga nalapas ang mga investment companies.
Sa mga nahadlok diha nga di maka-pay out sa ilang investments, nganong magyawyaw man nga risk takers man kaha kamo?
Sa mga nagpaluyo niining investment schemes, sunda lang ang balaod ug ipasabot lang pag-ayo ang inyong negusyo sa mga tawo, segurado ako nga di gyud kamo gukdon sa otoridad ug di gyud isirado inyong negosyo.