USA sa mga suliran sa mga dagkong siyudad sa nasud mao kining paghuot na sa mga sakyanan sa kadalanan.
Ang tunga sa oras nga naandang biyahe kaniadto, moabot na og tag-usa ka oras ug tunga o kaha tag duha ka oras na karon.
Apan mas grabe sa kaulohan kay halos di na moaginod ang mga sakyanan og tag duha ka oras hinungdan sa pagkalangay sa daghang mga motorista.
Mao ni ang hulagway sa daghang mga lugar dinhi sa nasud.
Ang siyudad sa Davao di luwas niini nga kahimtang, ilabi na karon nga nagsugod na sab ang klase.
Wala pay labot dinhi ang mga dumuduong nga mga biyahero nga kasagaran ang dakbayan maoy adtoan sa mga tawo gikan sa kaprobinsiyahan ug mga kasikbit nga mga lugar.
Taud-taod nang nakasinati kita sa maong kahimtang dinhi sa dakbayan. Nakaginhawa lang kita og diyutay sa nanglabay nga duha ka bulan kay wa may klase kay bakasyon.
Apan karon segurado kita nga mobalik na sab ang naandan nga paghuot ang mga dalan, kay magdungan na ang mga estudyante sa publiko ug pribadong mga eskuwelahan sa pagbukas sa ilang mga klase sunod semana, apil na mga kolehiyong tunghaan.
Hinuon, wala kita mawad-i og paglaum nga mahatagan gihapon og solusyon ang maong suliran dinhi sa siyudad. Ilabi na nga naa nay mga alternatibong mga ruta ang gihan-ay ug posibleng sa di madugay mapahimuslan na kini sa mga biyahero.
Ang pagpalapad sa kadalanan gikan sa poblacion padulong sa Sasa, Panacan, Bunawan ug Lasang lahos na didto sa Carmen, Panabo City ug Tagum City.
Mao sab dinhi sa habagatang bahin. Gani duna pay coastal road gikan sa may Toril padulong sa kinapusoran sa siyudad.
Naa poy mga dalan sa may Catalunan Grande nga gipalapdan ug molahos ngadto sa Mintal ug Calinan.
Gani niadtong milabay nga tuig, gibuksan ang by-pass road sa may Bangkal nga molahos ngadto sa Catalunan Pequeno padulong sa Mintal ug Calinan ug sa Puan ug Toril.
Hinuon medyo, naghuot gihapon sa maong lugar gumikan sa nagpadayon nga rehabilitation sa tulay sa may Ulas nga bahin.
Apan nagtuo kita nga kon mahuman na kining tanang mga gihan-ay nga mga dalan ug ang gipaabot nga railway gikan sa Tagum City padulong sa Digos City, seguradong moluag na gyud ang dagan sa trapiko, di lang dinhi sa siyudad, kon di sa mga kasikbit usab nga mga lugar.