PATAY ang usa ka lalaki human niya maluwas ang tulo ka magsuon nga naglisod og ginhawa ilawom sa yuta sa Lower Dampa, Barangay Magtuod, Maa, Siyudad sa Davao, Lunes sa hapon, Hunyo 3, 2019.
Giila ang namatay nga si Alfred Limcaoco Farola, 48-anyos, residente sa maong lugar samtang ang tulo nga naluwas niini gilla nga sila Ruel Bacus Montejo, 46-anyos, Ronald Bacus Montejo, 49-anyos ug si Jonas Bacus Montejo, 31-anyos, nagpuyo gihapon sa samang lugar.
Nasayran nga pasado alas 11 sa buntag, ang tulo ka magsuon naa ilawom sa bangag nga dunay gilawmon nga 60 hangtud 70 ka tiil nga giingong nag-treasure hunting sa dapit ang mga nahisgutan.
Giingong taud-taod nakasinati og problema ang tulo diin dili suma pa sila kaginhawa gumikan sa kabaho ilawom sa yuta.
Nanawag ang tulo ngadto sa ilang igsoon nga babaye aron mangayo og pakitabang.
Gilayong miresponde si Alfred Farola og iyang naluwas ang tulo, apan sa dihang siya na ang pasaka sa taas, kalit na lamang nahulog ang biktima sa ginagunitan niini nga pisi kinsa napadung sa ilawom.
Miabot usab ang mga sakop sa Central 911 ug nakuha ang biktima nga daling gidala sa Southern Philippines Medical Center apan gideklara kining dead on arrival.
Gilayon sab nga gimando sa otoridad nga pasirad-an ang maong bangag.