KON usa ka sa niusab sa imong tambutso kay gusto ka nga saba kini, pahimangno kini nimo.
Ang Land Transportation Office (LTO) niluwat na usab og direktiba nga panakpon na usab kining gihulagway nga “bora bora” o kining mga modified nga mufflers o tambutso.
Pipila ka mga tuig na ang nakalabay, gipanakop ang mga motorsiklo nga nanagtaud niini tungod kay kalapasan kini sa balaud sa transportasyon.
Gawas niini, daghan usab ang mga reklamo tungod sa kalangas sa mao nga mga tambutso.
Duna gani pribadong mga subdivision nga nagdili sa pagsulod sa mga motorsiklo nga nagtaud niini.
Makairita
Sa memorandum nga gipirmahan ni LTO chief Edgar Galvante, nihulagway kini sa mga modified mufflers nga “undesirable ug irritatting sound.”
Lakip sa dakpon kadtong mga habalhabal nga motorsiklo nga nagbuga og itom nga aso.
“In addition, as per the instructions of DOTr Secretary Arthur Tugade, habal-habal operation which has contributed to the emission of much carbon dioxide shall also be subject of apprehension,” tipik sa memorandum.
Niadto pang Abril 29 ang memo, apan niadto lang Hunyo 3 nadawat sa mga regional directors sa LTO offices sa nasod.
“We are preparing already our operational plan for this directive, subject to the proper guidelines. What we want to avoid are arbitrary apprehensions that (will) not just cause inconvenience but also unjust action subjected to motorists and the public in general,” pagpasabot ni LTO 7 Regional Director Victor Caindec.
Dugang niya nga wa pa ang formal nga transmittal sa maong memo, apan nakadawat na siya niini sa Viber.
Tuig 2015 dihang gipatuman kining pagpanakop sa “bora-bora” apan wa midugay.
Base sa kasamtangan nga regulasyon sa LTO, dili dapat molapas sa 115 decibels ang kasaba sa tambutso.
Aduna’y multa nga P5,000 ang madakpan nga molapas niini ug i-impound ang motorsiklo.
Makuha lang kini sa tag-iya basta ilisan ang tambutso o ibalik ang orihinal.