NAGBANGUTAN karon ang Cagayan de Oro City Police Office (Cocpo) ug ang tibuok Siyudad sa Cagayan de Oro human nakabsan na sa kinabuhi ang city director niadtong alas 3:30 sa hapon, Martes, Hunyo 4, samtang nagpaalim sa Polymedic Medical Plaza sa Kauswagan ning siyudad.
Nasayran nga naaksidente si Police Colonel Nelson Aganon, city director sa Cocpo, sa edad nga 46 human wala nakaagwanta sa iyang naangkon ilabi na sa ulong bahin atol sa pagkaaksidente niadtong Mayo 22 samtang nagpahigayon og pre-jump sa motorcycle riding course.
Sa nahipos nga impormasiyon gikan sa Cocpo, gibutyag nga gideklara kining patay sa iyang doktor nga si Dr. Sarael Brobo tungod sa pagkaaksidente ug nakaangkon sa giingong cardio-pulmonary arrest, secondary to brain herniation, ug secondary to acute intracerebral hemorrhage left frontal lobe with intraventicular extension.
Gibutyag usab sa officer-in-charge Police Lieutenant Colonel Reynante Reyes nga gitabang pa kini sa kinse ka higayon sulod sa kapin usa ka oras si Aganon apan walay swerteng wala na kini maluwas.
Nagpagawas usab og pahisubo si Cagayan de Oro Mayor Oscar Moreno kinsa nakurat sa nadungog nga balita ngadto sa pamilya sa una na nga nipanaw nga opisyal sa siyudad.
“We convey to his widow and children, and to the rest of his family, our deepest sympathies and condolences. Our hearts go to them in this hour of bereavement. We pray that God will grant Colonel Nelson’s soul eternal rest and peace. We thank and honor him for his exemplary service as Cagayan de Oro’s chief of police. He had done his duties very well and with pride and dignity, and we will all miss him,” pahayag ni Moreno.
Ang patay nga lawas niini kasamtangang anaa gihaya sa Cosmopolitan Funeral Parlor nga nahimutang sa Siyudad sa Cagayan de Oro samtang naka half staff na usab ang bandila isip pagsubo sa kamatayon sa opisyal sa dakbayan.
Gitakda usab nga ihaya sa Cocpo headquarters ang patay’ng lawas niini una ibiyahe sa Manila ngadto sa iyang yutang natawhan sa Nueva Ecija diin kini ilubong.