Motor naigo sa truck, drayber DOA sa tambalanan tungod sa kakusog sa impact

CEBU. Wala kaabot sa tambalanan si Earl Rodis human kini siya natapsingan sa usa ka truck nga niresulta sa pagkabangga niini sa lain napud nga truck sa Barangay Langtad, siyudad sa Naga, habagatang Sugbo. (Tampo hulagway gikan ni Jeremy Setrina)
CEBU. Wala kaabot sa tambalanan si Earl Rodis human kini siya natapsingan sa usa ka truck nga niresulta sa pagkabangga niini sa lain napud nga truck sa Barangay Langtad, siyudad sa Naga, habagatang Sugbo. (Tampo hulagway gikan ni Jeremy Setrina)

PATAY ang usa ka trabahante sa usa ka pribado nga kompanya nga tig-supply og tubig dihang nabangga ang gimaneho niini nga motorsiklo sa usa ka trailer truck sa Barangay Langtad, siyudad sa Naga niadtong alas 12 udto sa Miyerkules, Hunyo 6.

Bisag daling nadala siya sa Cebu South General Hospital sa Barangay Tuyan para magpatambal, nakabsan lang gihapon sa kinabuhi si Earl Rodis mga pila ka minutos ang nakalabay.

Base sa inisyal nga report sa City of Naga Police Station, si Rodis, usa ka field operative sa Helpmate Inc. ug residente sa Barangay Pooc, Siyudad sa Talisay, nagsakay sa iyang motorsiklo padulong sa Siyudad sa Sugbo sa wa pa nahitabo ang aksidente.

Samtang nagbyahe si Rodis, usa ka trailer truck nga gimaneho ni Raul Ababon, 43, residente sa Barangay Sudlon, Siyudad sa Sugbo, ang nagsunod sa motorsiklo.

Sigon ni Police Lieutenant Colonel Jason Villamater, hepe sa kapulisan sa siyudad sa Naga, sa dihang naabot na sila sa Barangay Langtad, nabantayan ni Rodis nga naay giparking nga laing truck nga nagdiskarga og mga tangke sa LPG.

Tungod kay nagbabag ang truck sa iyang agianan, nisuway si Rodis og overtake sa maong sakyanan.

Pero wala kabantay si Rodis nga ang truck ni Ababon nisuway sad og overtake sa iyang motorsiklo nga niresulta sa pagkaigo niini ug pagkabanda sa nakaparada nga truck.

Human sa hitabo, ni-surrender si Ababon sa kapulisan ug kasamtangang na-detain sa City of Naga Police Station.

Giandam na sad sa kapulisan ang pagpasaka og kasong reckless imprudence resulting to homicide batok ni Ababon.

Wa pa hinuon masayri kon mokiha ba ang pamilya sa biktima. (GPL & JKV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph