Sugilanon: Panagna

NAKAGRADWAR na si Aristeo sa hayiskol. Mao karoy iyang gipangandoy nga makatrabaho siyag usa ka kompaniya kay gusto niyang makatigom ug unya mopadayon pagtungha ug aron makatabang sab siya sa iyang nanay ug tatay nga way klarong trabaho. Mangangahoy lang sila ug kon dili mangahoy mamakyaw og guna sa mga tugkaran sa silingan nilang mga dato.

Alang kang Aristeo, maayo man gyud nang gaan ang trabaho kay dili ka mabun-og ug dili daling masakit, samtang kon manarbaho kag konstraksiyon mapagba ang imong lawas sa kainit sa Adlaw. Apan gidemalas si Aristeo kay namatay ang iyang ginikanan; nahilo sa kamoteng kahoy.

Ug karon gipensar pag-ayo ni Aristeo ang iyang hunahuna. Nag-inusar na lamang siya sa ilang payag. Unsay maayo niyang buhaton aron mabuhi ug aron duna siyay kan-on matag adlaw. Gipanumpa na man niya sa iyang kaugalingon nga dili gyud siya motrabaho konstraksiyon. Unya samtang naghunahuna og halawom kaayo, nahinumdom siya sa iyang anhing Lola Rufina nga usa ka albularya nga motagna sab sa umaabot sa usa ka tawo. Husto! Mao na lang kini iyang buhaton. Iyang suwayan ang pagpanagna, namasin nga kini na ang matang sa trabaho nga makahaw-as kaniya sa kawad-on.

Ang una niyang gibuhat mao ang pagsunod kang Pidoy sa hilom nga paagi. Bisag asa si Pidoy iya kining gisundan. Ug iyang nadiskubrehan nga duna kiniy gipanglubong nga mga sensiyo sulod sa langob nga nahimutang ibabaw sa ilang balangay. Ang mga sensilyo gisulod sa usa ka dakong tadyaw. Tingali gusto gyud ni Pidoy nga magpundo gyud siyag daghang mga sensilyo.

Dihang nagkahinabi ang duruha, sila Pidoy ug Aristo.

“Doy, akoy gibinlan sa abilidad ni anhing Lola Rufina nga motagna sa umaabot o sa kapalaran sa usa ka tawo. Kamao ka motagna, Doy?”

Mitutok si Pidoy kang Aristeo. Yati ra, sa ato pa naliwat ka diay sa imong apuhan nga mananagna. Tigtagna sa kapalaran sa two.”

“Oo, Doy. Makatagna na ko,” ni Aristeo nga miigham.

“O, sige. Tagnaa kuno kon moasenso ba ko sa umaabot nga mga adlaw.” ni Pidoy.

“Sige, ambi ang imong tuong palad,” ni Aristeo nga mikab-ot sa tuong kamot ni Pidoy. Unya mipiyong dayon si Aristeo ug human sa pipila ka segundos namulong siya, “Makuwartahan ka, Doy, kay duna kay gilubong nga mga kuwarta ug sa ngadto-ngadto motubo kini. Akong nakita sa linya sa imong palad nga tua nimo kini ilubong sa usa ka hilit nga langob.”

Nakadayeg si Pidoy kang Aristeo kay natagnaan niini ang iyang gibuhat nga may gilubong siyang mga sensilyo sulod sa usa ka langob.

“Tuo ko nimo, Aristeo. Belib ko nimo. Usa ka gayud ka mananagna. Liwat ka sa imong apuhan!” ni Pidoy.

Ug nagsugod nga nainila si Aristeo. Kutob sa moanha sa iyang pinuy-anan kay magpatagna mopahalipay gyud kaniyag salapi kay natagnaan niya. Ambot kon natsambahan ba niya o unsa ba ang pagtagna, midaghan ang nagpatagna kaniya. Unya usa ka adlaw, sayo sa buntag, may usa ka armadong tawo ang buot magpatagna kang Aristeo.

“Ang akong trabaho mao ang pagpatay og tawo, basta husto ang bayad. Usa ako ka ‘hitman’ o ‘gun-for-hire.’ Unsa man, bala ba ang akong kamatyan o sakit?” matod sa armadong tawo nga nagtakin og pistola sa iyang hawak.

Milingi-lingi si Aristeo nga gipangulbaan. Duna siyay nabatyagan nga duha ka tawo nga nagsakay og motorsiklo nga pulos nagsul-ob og ‘bonnet.’ Nakita niya nga ang ‘backrider’ miibot sa pistola niini ug mition tumong sa ‘hitman’ nga nagpatagna kaniya.

“Unsa bala ba akong kamatyan o sakit?” misukot pag-usab ang armadong tawo.

“Ba-Ba-Bala. Bala ang imong kamatyan!” tubag ni Aristeo. Dungan sa paglitok ni Aristeo sa pulong ‘bala’ milanog ang upat ka masipang buto sa pistola.

Ug nahagba sa yuta ang ang armadong tawo nga nagpatagna kang Aristeo kon unsay kamatyan niini. Mikurog si Aristeo sa kalisang nga mitan-aw sa duha ka tawo nga nag-bonnet nga daling mipadagan sa motorsiklo pahilayo. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph