GIPANGLUBONG sa Tunghaan, Tungkil ug Red Team ang ilang tagsatagsa ka mga kaatbang sa nagpadayon nga 2019 Minglanilla Mayor’s Cup Summer League basketball tournament nga gipahigayon sa Minglanilla Sports Complex niadtong Lunes.
Ang Tunghaan mipukan sa Ward I, 102-72, sa 17-under sa Bracket A aron irehistro ang ilang ikaupat nga daog sa unom ka duwa samtang ang Ward I nahagsa ngadto sa 1-5 nga baraha.
Si Jimboy Rapayla mipakatap og 27 puntos, midugang og 19 puntos ni Ryan Sellote aron pangulohan ang Tunghaan.
Mitali og 22 puntos si Androe Abregonde alang sa naparot nga Ward I.
Sa 21-under division, pabiling limpiyon ang baraha sa Tungkil team (5-0) sa dihang ilang gikusokuso ang Tunghaan 2, 107-69.
Ang pambato sa Tungkil nga si Ace Go mipaulbo og 35 puntos, mitali og 20 si Meljun Aleria ug 18 usab ang natampo ni Raite Montemayor alang sa Tungkil nga miwanang sa ilang dalan paingon sa sunod round.
Ang Tunghaan 2 nga may 2-3 nga record gipangulohan ni Jeffrey Rafayla nga mayb 15 ug tag 14 puntos usab matag usa nila ni Gian Canoneo ug James Rafayla.
Saktong dominasyon ang gipakita usab sa Red Team human kini mikulit og 114-77 nga kadaugan batok sa Orange sa 40-up division.
Kadto maoy unang daog sa Red sa ilang duha ka duwa samtang ang Orange padayon pang wala makaangkon og kadaugan. (JBM)