NAG-ung-ong ang daghang kausaban sa Dakbayan sa Lapu-Lapu sa paglingkod unya sa bag-ong administrasyon ni Mayor-elect Junard 'Ahong' Chan karong Hunyo 30, 2019.
Usa sa mga kausaban mao ang color branding sa dakbayan.
Apan, matod ni outgoing Lapu-Lapu City Mayor ug in-coming nga representante sa bugtong distrito sa Lapu, Paz Radaza, nga ang naasoyng branding gipaagi og ordinansa sa konseho busa dili kini bastabasta mailisan.
Mao kini ang reaksiyon ni Radaza sa taho nga dunay plano ang umaabot mayor sa dakbayan nga ilisan ang color branding.
Dugang ni Radaza, bisan ang opisina sa kongresista sa lone district sa dakbayan nga anaa mahimutang duol sa Mayor’s Office gitukod pinaagi sa usa ka ordinansa sa konseho.
Ang naasoyng opisina mao ang opisina sa iyang anak nga si outgoing Congresswoman Aileen Radaza.
Si Chan una nang namahayag nga hugot niyang tun-an ang pag-usab sa color branding sa dakbayan sa higayon nga molingkod na siya isip mayor.
Hinuon, giklaro niya nga kon ugaling dako ang gasto kalabot niini sa iya unyang pagkonsulta. dili na lang kini niya hilabtan. Mas unahon niya ang pag-atiman ang ubang buluhaton sa dakbayan inay magsige og pamintal.
“Mangita ta og paagi matan-aw nato pilay nagasto sa pintal unya magamit nato sa laing paagi unya nga mas priority pa nato nga kung dako kaayo budget nahatag sa pintal unya naa pay mas dako diayng tabangonon sama sa atong pobreng mga Oponganon nga di ka-afford sa tambal so instead of paint we will buy medicine na lang,” matod ni Chan.
Atol sa administrasyon ni Radaza, gipatman ang color branding sa dakbayan.
Sa pagkakaron makita ang mga imprastaktura sa dakbayan sama sa government buildings, mga poste, sakyanan, center islands ug uban pang pampublikong lugar sa dakbayan nga gipintalan og kolor nga skyblue, yellow, orange, ug green.
Gani ang mga uniporme sa mga empleyado susama usab ug color.
“Other than sa ordinansa ako man gitan-aw nga naa may (Commission on Audit) COA, (Department of Interiror and Local Government) DILG, Registry of Deeds. I think mao ra man siguro na naa within sa yuta sa kuan (gobyerno). So kana diha gyud gihapon ko mag opisina unya (sa huhatan sa iyang anak nga gumagawas nga kongresosta)” matod ni Radaza. (GCM)