Kapin 200 mipetisyon batok landfill

BINALIW LANDFILL: Ang aerial view sa Binaliw landfill sa bukirang dapit sa dakbayan sa Sugbo nga nipahak sa dakong bukid sa dapit diin gi­pro­testahan sa mga lumolupyo. (Tampo nga hulagway)
BINALIW LANDFILL: Ang aerial view sa Binaliw landfill sa bukirang dapit sa dakbayan sa Sugbo nga nipahak sa dakong bukid sa dapit diin gi­pro­testahan sa mga lumolupyo. (Tampo nga hulagway)

KAPIN 200 ka mga residente sa Barangay Pit-os, kasikbit sa Barangay Binaliw diin nahimutang ang pribadong landfill, nipakita na usab sa ilang pagsupak sa maong pasilidad sa bukirang barangay sa dakbayan sa Sugbo.

Ang maong mga tawo lakip sa nipirma sa signature campaign nga gilusad para mahunong ang operasyon sa landfill sanglit sila ang numero unong apektado gumikan sa kabaho sa basura nga molabay sa ilang barangay karga sa garbage trucks.

“Kami nga mga molupyo sa barangay Pit-os, supak sa baho sa mga basura nga karga sa mga garbage trucks nga molabay sa kadalanan dinhi sa among barangay,” tipik sa sa ilang signature campaign.

Si kanhi kapitan ug karon kagawad sa Barangay Apas Ramil Ayuman, kinsa nitabang sa 200 ka residente sa iyang barangay nga na-relocate sa Binaliw. nagpasalamat sa suporta sa taga Pit-os sa pagsupak sa landfill.

Unang nilusad og signature campaign mao ang taga Binaliw kansang signature niabot og 400 ka mga tawo.

Sa iyang Facebook post, gipahibawo ni Ayuman nga niabot na ang baho gikan sa landfill didto sa barangay Panoypoy, sakop sa Consolacion, kasikbit sa Binaliw.

Si Ayuman nagkanayon nga inisyal pa ang maong gidaghanon sa barangay Pit-os ug mapun-an pa kini sa umaabot nga mga adlaw.

Sa umaabot, iduso na usab ang mga pirma nga nakuha sa Protect Binaliw Movement sa mga barangay gikan sa Agsungot, Bacayan ug Pulangbato nga maoy mga barangay nga duol sa landfill.

Sila nagtinguha nga makakuha og labing minos 1,000 ka mga pirma gikan sa maong mga barangay.

Si Ayuman niingon nga ang grupo ni Jefferson Omandan kinsa maoy pangulo sa movement moduso ngadto sa mga pirma sa buhatan sa Environmental Management Bureau (EMB).

Ila sab unya hatagan og kopya si Mayor-elect Edgardo Labella sa higayon nga molingkod na siya isip mayor sa dakbayan sa Sugbo. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph