UNOM ka mga tawo, lakip ang tag-iya niini, ang nasikop sa pagronda sa mga sakop sa Regional Special Operations Group (RSOG) 7 sa illegal distributor sa mga butane canister sa Barangay Tribunal, siyudad sa Mandaue ug sa Sitio Asinan, Barangay Mantuyong sa samang dakbayan.
Nahitabo ang operasyon sa alas 6: kagahapon sa buntag, Hunyo 5, inabagan sa Mandaue City Police Office (MCPO) nga gipangulohan ni Police Lieutenant Lino Baylosis ug Police Captain Andy Michael Roque.
Ang mga nangadakpan giila nga sila si Joven Tercio, 38, taga Catarman Liloan, ang nagpadagan sa negosyo sa ilegal nga butane canister; Alejandro Malaran Jr., 27, Catarman Liloan; Jimwel Tejas, 26, taga Maguikay, Mandaue; Reynan Del Castillo, 38, taga Rizal St., Centro Tribunal Mandaue; Javier Tevez, 37, taga Plaridel St., Barangay Alang-alang, Mandaue; ug Abel Gonzaga, 46, taga B. Ceniza |t. , Sitio Asinan, barangay Mantuyong, Mandaue.
Ang mga nasakmit nga mga ebedensa mao ang sakyanan nga gigamit sa paghatod sa butane canisters.
Samtang, nikabat og 3,203 ka butane canisters nga puno sa liquefied petroleum gas LPG nga mobalor sa P 143,998 ug 454 ka empty tin canister nga adunay kantidad nga P 9,988 ug ang halin nga mokabat sa P1,446.00.
Matod ni Police Major Ricardo Tero, hepe sa RSOG-7, nga adunay naka hatag kanilag impormasyon labot sa ilegal nga negosyo sa siyudad sa Mandaue.
Dali nila nga gipaubos sa validation ug surveillance ug sa dihang nagpositibo, gihimo dayon ang buy-bust.
“Naay naka info nato bahin ana mao to nga gi-surveillance nato hangtod nga gi-evaluate mao na dayon to nga gi palitan sa nato ug gi-take effect ang dakop," matod ni Police Major RicardoTero.
Sila, matod pa, ang mo-supply sa mga butane sa mga silingang MGA barangay sa Tribunal ug Mantuyong sa Mandaue diin dinaghan ang ilang makompra nga mga butane canister.
Ang paagi sa ilang negosyo ibilin nila sa mga tindahan sa usa ka sitio ug ila ra kining balikon kung mahurot na. (AYB)