NING tulo na lang ka mga semana nga nahabilin sa termino ni Cebu City Mayor Tomas Osmeña, iyang mga kaalyado sa City Council nihimo og katapusang mga lakang aron madeklarar nga imbalido ang pagkahalin sa mga lote sa South Road Properties (SRP) niadtong 2015.
Sa ikatulong higayon, si Konsehal Sisinio Andales, kaalyado ni Osmeña, ni-sponsor og laing resolusyon nga nagdeklarar sa sale sa mga lote sa SRP nga void.
Dunay upat nga ningsupak, ang City Council niadtong Martes, Hunyo 4, niaprobar sa resolusyon nga naghangyo sa City Legal Office sa pag-file og petition alang sa declaratory relief.
Ang petisyon nagtinguha nga madeklarar nga void ab initio o void sukad pa sa sinugdan sa negotiated sale sa mga lote sa SRP nga na-award ngadto sa consortium sa SM Prime Holdings Inc. ug Ayala Land Inc. (SM-Ayala consortium) ug Filinvest Land Inc. (FLI).
Sa 2015, ang SM-Ayala consortium ug FLI mao ang gipangdeklarar nga winning bidder sa sale sa 45.2-hectare nga lote sa SRP pinaagi sa public bidding.
Sa 45.2 hektarya, ang SM-Ayala consortium nipalit og 26.3 hektarya samtang ang FLI nipalit og 19.2 hektarya.
Ang mga nakapalit nibayad og pasiunang P8.3 billion sa Siyudad sa bayranan niining P16.76 billion sa kinatibuk-ang halin. (RVC sa SunStar Cebu)