ADUNAY maayong balita alang sa mokabat sa 433,000 ka mga kawani sa mga restaurant ug mga hotels sa tibuok nasud. Giratipikahan sa Senado sa hapon niadtong Martes, Mayo 28, ang usa ka balaudnon nga maghatag sa 100 porsento sa service charges nga gikolekta sa management ngadto kanila.
Sa sayo pa sa maong adlaw, gi-aprobahan sa Congress Bicameral Conference Committee ang reconciled version sa Senate Bill No. 1299 ug House Bill No. 8784 bahin niini. Ang makapahimulos niini mao ang mga rank and file employees ug mga supervisors sa maong mga establisimento.
Subay sa reconciled version, bahinon equally, angayon, ang service charges sa tanang hingtungdan nga mga kawani sa mga restaurants, hotels ug susamang mga establisimento. Sa samang paagi, wa magmando ang maong balaudnon sa pagpatong og service charges.
Apan nagkinahanglan pa kini sa ratification sa House of Representatives, una pa kini isumitir ngadto sa pangulo aron pirmahan ug mahimo nang usa ka balaod.
Unsa man ang existing nga balaod bahin niini?
Ang Art. 96, Labor Code, nagkanayon, “ Service charges. All service charges collected by hotels, restaurants and similar establishments shall be distributed at the rate of eighty-five percent (85%) for all covered employees and fifteen percent (15%) for management. The share of the employees shall be equally distributed among them.”
Apan si Senador Joel Villanueva, chairman sa Senate committee on labor, employment and human resources development, niingon nga daghang mga kawani ang nireklamo kay wa tumana ang maong balaod sa management.
Kadtong nituman, gibali pa gyud – 85% ang bahin sa management ug 15% na lang ang gihatag ngadto sa mga kawani. Ubos sa bag-ong balaudnon, di na gyud mabali kay 100% man ang ihatag ngadto sa mga kawani.
Si Villanueva niingon nga ang 15% nga bahin sa management sa service charges gigamit alang sa pagtapal sa mga breakage, kon dunay plato o baso nga mabuak, ug sa pilferage, kon pagkawagtang sa mga supplies.
Apan unsay mahitabo kon wagtangon sa management ang service charges? Ang Labor Code nagkanayon, “In case the service charge is abolished, the share of the covered employees shall be considered integrated in their wages.”
Nagdili ang maong balaod sa elimination or diminution of benefits. Sa ato pa kon unsay naandan nga bahin sa mga kawani gikan sa service charges, himuon na kining tipik ug kabahin sa ilang inadlaw nga suholan. Kining maong probisyon gipabilin sa bag-ong balaudnon. (edbarrita@gmail.com)