AMBOT og unsay problema aning pildero nga konsehal, Pastor Alcover Jr., nga mora man og nagsalimuang. Morag irong buang nga nagpataka lang pamaghot. Morag himungaan nga pataka lang og putak-putak. Wala pa ba siya nakadawat sa iyang kapildihan nga gisalikway siya sa mga botante sa north district. Bisan kon incumbent siya, apan nabutang sa ika-13.
Wala pa siguro makadawat si Alcover sa iyang kapildihan aron maka-move on na. Bisan humana ang eleksiyon, nagsige gihapon og ataki kang Councilor elect Nina Mabatid, iyang kauban sa line up sa Barug PDP Laban sa north district. Kay lagi kuno gi-junk siya ni Mabatid. Nagsolo-solo lang kuno kini og kampaniya ug wala dad-a ang grupo. Unsa man diay gusto aning Alcover nga mosakay lang siya libre sa makinarya ni Mabatid? Nganong patuga-tuga man siya og lansar nga wala man diay siyay kuwarta. O gusto lang siyang manguwarta?
Dili na tinuod nga gi-junk siya ni Mabatid kay sa sample ballot ni Mabatid gibutang man silang tanan. Aduna lay special operation siguro si Mabatid aron ma-ila siya sa mga botante. Natural man lang siguro kay bisan kauban mo sa partido, imo man gihapon nga kompetensiya sila.
Gisuka lang gyud siya sa mga botante. Aber, unsa may iyang major accomplishments sa konseho ug kongreso kaniadto? Bisan man gani sa iyang pagka-partlist congressman sa Anad, wala man siyay nahimo. Gani gitabangan siya ni Mabatid l. Adunay bank desposit nga ika-presentar si Nina nga naka-deposito siya sa account ni Alcover. Niadtong November 19, last year naka-deposito si Mabatid sa account ni Alcover og P24,000 sa BPI
Gawas niini, gihatagan ni Mabatid si Alcover og P300,000 para sa pagkaon sa mga habal-habal drivers sa kabukirang barangay nga gi-organized ni Mabatid para sa iyang caravan. Apan pansit ray nadala ni Alcover para sa mga habal-habal drivers. Asa man ang kuwarta? Unya sigeg putak-putak nga si Nina maoy hinungdan sa iyang kapildihan. Naburyong na siguro ning tawhana kay pilde man. (bobbygnalzaro@gmail.com)