UPAT ka mga tawo ang gipamusil sa managlahing mga dapit sa Sugbo, tulo niini sa lungsod sa Bantayan samtang usa sa Cebu City.
Sa upat, usa ang patay samtang duha ang kritikal.
Ang unang pagpamusil nga niangol og tulo ka mga tawo nahitabo sa Barangay Putian, lungsod sa Bantayan, isla sa Bantayan, Huwebes sa kaadlawon, Hunyo 6.
Ang tulo ka mga biktima gikan ning-disco sa usa ka pista.
Sa ilang pagpauli, ilang nasugatan ang suspek nga si Joe (di tinuod nga ngan), 16, lumad nga taga Cadiz City, apan kasamtangan nga nagpuyo sa Barangay Putian.
Mga biktima mao silang Mark Ruiz Cueva, 19, taga barangay Ticad; Justine Seville, 16, taga barangay Kabangbang; ug Ryan Giltendez Sinangote, 21, taga sitio Kanlalay, Barangay Kabangbang sa mao nga lungsod.
Human sa pagpamusil, ning-report ang mga tawo sa police station ug nianang pagkabuntag mihimo silag manhunt operation sa gituohang hideout nga miresulta sa pagkasikop ni Joe.
Nakuha sa kapulisan gikan sa posisyon ni Joe ang usa ka improvised shotgun (sumpak) nga loaded sa basiyo sa bala nga gituohan nga maoy gigamit sa pagpusil niya sa mga biktima.
Si Police Major Jun Tabigo-on, hepe sa Bantayan Police Station nagkanayon nga adunay sakit sa pangutok si Joe nga giingong bayolente kon masuko.
Sa dihang padung na mamauli ang mga biktima, ilang nasugatan si Joe ug gipangutana kon nakaila ba kini kanila.
Apan niuli si Joe sa ilang balay ug nibalik nga nagdala nag sumpak ug way daghang estorya gipamusil ang mga biktima.
“Nag tanong lang daw itong mga biktima at nang umuwe, yung suspek kumoha na pala ito ng sumpak at inabangan na sila at binaril na itong mga victim,” matod ni Tabigo-on.
Daling gidala ang mga biktima sa Bantayan District Hospital, apan pipila ka oras ang milabay, silang Cueva ug Seville gibalhin sa Vicente Sotto Memorial Medical Center tungod kay naa sa talandugon ang kahimtang.
Si Seville naigo sa likod nga midulot sa iyang baga ug tiyan samtang si Cueva naigo sa kidney.
Tulo ka mga kasong frustrated murder, illegal possession of firearms ug kalapasan sa Commission on Elections (Comelec) gun ban ang atubangon ni Joe.
Gipatay
Patay ang usa ka construction worker human pusila maka tulo ka higayon sa riding in tandem pasado alas 4 sa Huwebes sa hapon, Hunyo 6, sa sitio Malipayon, Barangay Inayawan, Siyudad sa Sugbo.
Ang biktima giila nga si Julious Gomez, 50, nagpuyo ra usab sa maong dapit.
Si Gomez nakaangkon og duha ka samad pinusilan sa tuong ilok ug usa sa tuong kilid sa lawas.
Matod ni Police Lieutenant Eleazar Milloneda imbestigador sa Pardo police station, wa pa silay matumbok nga suspek.
Apan ang igsuong babaye niini nga si Jocelyn Santos nipahibawo nga nabilanggo na kaniadto ang iyang maguwang sa kasong pagpangawat.