NAGPAGAWAS og direktiba si Cagayan de Oro City Mayor Oscar Moreno ngadto sa tanang mga police station ug sa lokal nga buhatan sa gobyerno nga mag-half-staff sa bandila isip pagsubo sa kamatayon sa hepe sa Cagayan de Oro Police Office (Cocpo).
Nakabsan sa iyang kinabuhi si Police Colonel Nelson Aganon, Cocpo director, sa edad nga 46, niadtong mga alas 3:30 Martes sa hapon, Hunyo 4, human naaksidente sa pre-jump sa motorcycle riding course niadtong nilabay nga bulan.
Gimando usab ni Moreno nga kini hangtod sa Hunyo 11 o hangtod sa haya ni Aganon nga madala na pagbalik sa iyang dapit sa Nueva Ecija.
Nasayran nga ubay-ubay na nga mga bandila ang makita sa siyudad ilabi na sa adlaw mismo sa bandila niadtong Mayo 28 hangtod na sa Hunyo 12 sa Adlaw sa Kagawasan.
Ang patay nga lawas ni Aganon unang gihaya sa Cosmopolitan Funeral Homes sa Capistrano ug gidala sa Cocpo headquarters sa Barangay 40 alang na usab sa Luksa ng Parangal ug ibalik kini pagbiyahe sa kaulohan direkta sa Nueva Ecija.